Shim kyrteng ia kiba sah wai, ong ka KHADC ia ki Rangbah Shnong

Shillong:Ka Khasi Hills Autonomous District Council (KHADC) ha ka sngi palei ka la rai ban phah da ka notis ban phah ia ki dorbar shnong ba kin shim kyrteng lut ia baroh kiba sahwai, ha ki shnog kiba hap ha ka jingpeit jong ki.

Kane ka rai la shim ha ka jingialang Council Executive committee (CEC) ba kynthup ia kumba 50 tylli ki dorbar shnong na ki bynta bapher bapher jong ka nongbah Shillong.

“Ngi la shim ia ka rai ba shen ngin pynmih ia ki notis na ka Khasi Hills Autonomous District Council Maintenance of Household Register sha baroh ki dorbar shnong, ban shim kyrteng ia ki nong shong wai ne ki ba dei khasi ne ki bym-dei khasi ruh kiba wan na kiwei pat ki jylla”,la ong u bah Titostarwell Chyne.

“Ngi la shim ruh ia ka rai ba kan long beit ia baroh lang ki trai ïing ba kin iathuh bad ioh jingbit na ka Dorbar shnong da ki kwah ban ai wai ia ki ïing, kane ka juh kan long ruh ia ki dukan ba la shong da ki briew ki bym dei satia ki ritpaid. Ngi dap ruh ka jingsngew kmen ban tip ba bun na ki shnog ki la dep shim lypa ia kane ban iada ia ka jaitbynriew ha la ka jong bad ban pyntikna ba ngin ym shah tam noh ha ka jing bunpaid hala ka ri” ong U CEM.

U bah Chyne u la ong ba ia ka rai la shim hadien ba ka jingjia ha Madanryting, ha kaba kiwei pat ki para riewlum na Manipur ki la sdang ban wan ha ki shnog ki thaw bad sha kylleng ki bynta jong ka nongbah
Ka donkam ia ka sorkar jylla ba kan buh ia ki relief camps ban sah kyrpang tang kine ki briew ba phet na jylla Manipur hadien kane ka jingjia ia kulmar.

Ka KHADC ka donkam ruh ia ka jing-iatreilang na ki dorbar shnong ban peit bniah ia ka jingkhaïi beaiñ ha ki shnog ki thaw.
“Ngi la rai ruh ban ailad ia ki dorbar shnong ba kin peit ia ki trading license, ki dorbar shnong kim dei ban ai kino-kino ki NOC khlem da ioh ka jingmynjur ba 1/3 jong ka Excutive dorbar” ong U CEM.

Ka dorbar shnong ka don ruh ia ka hok ban pynduh ia ka NOC, lada ki kam ki dei ba ki briew jong ngi ki lah ban pyntyllun hi ia katri ka kam, kane ka dei katkum ka Non Tribal Regulations Act.
Ka KHADC ka la wanrah ruh ia ka notis haba iadei bad ka jingai ia ka permanent residence certificate (PRC) bad ka Dominicile certificate da ki dorbar shnong.
Katkum ka kyndon jong ka konsil u briew u ba dei u Schedule Tribe jong kiwei ki jylla, lada u/ka la ioh jingithuh hapoh ka jylla um lah satia ban kam ia ka PRC jong ka jylla.
Haba iadei bad ka Dominicile certificate, u la ong ba ka jingai ia katei ka certificate, dei sha kito kiba la shong la sah ha ka jylla la palat 12 Snem.La buh jingkyrpad ruh ia ki dorbar shnong ba kim dei satia ban pynshong nongrim tang ia ka dur vote bad ka Rationcard ban ai ia ka DC.
U khliehduh jong ka konsil, un sa ia shong jingialang kumno ban pyntreikam ia ka Land act lyngba ki dorbar shnong.