Shim khia ka NCW, ba shah thad ka samla ha sawngut ki shynrang

Shillong:Ka National commission for women – NCW ka la shim kam hi hadien ba ka la iohi ia ka jingmih khubor ba kawei ka samla ka la shah thad bad shah leh khlem akor ha ki saw ngut ki shynrang.

Ha ka jingiakren bad ka dkhot ka Commission ha kane ka sngi Thohdieng, kaba dei na kane ka jylla, ka Kong Delina Khongdup, ka la ong ba hadien ba la iohi ia ka video ba ka samla ka la kren sha social media, ka la shim khia ban kren bad u Superintendent of Police, bad la pan jubab ruh na u Director General of Police (DGP), hynrei um pat ai kano kano ka jubab halor kane.
Ka kong Delina ka la ong ba lada u DGP um pat ai kan phah biang bad lada um ai, kan shu phah wan noh ia u sha Delhi, ban shim bishar ia u.

Ka la ong ba kito ki runar kila shah thep phatok bad ka Commission ka la shim ba kane ka dei ka kam runar kaba shyrkhei tam bad ym dei ban ai jamin jem bad ka sorkar ka dei ban leh da kaba tyngeh.
Shuh shuh, ka kong Delina ka la ong ba ka Kashari kan sa bishar ia ka ejahar kaba u la ujor uba dang rit rta pyrshah ia katei ka samla.

Ka la ong ba ka donkam ban don ka Fast Track Court ia ki kam runar kiba shyrkhei kum kane khamtam ia ki kynthei, bad lada ka sorkar lyngba u DGP kim ai jubab, ka Commission kan shim da kawei pat ka lynti katkum ka bor kaba la pynkup ha ka.
Lah ban kdew ba kawei ka samla ka la ujor ejahar ia ki saw ngut ki shynrang kiba la kynnoh, ba ki la bat tnga jubor ia ka, da kaba pyndih ki kynja jingpynbuaid. Ka la kren ruh sha ki lad social media ha kine ki sngi ba la dep.