Shim bynta shitrhem ki samla ka Balang Catholic, ha ka Convention ha Nongkhrah

Nongpoh: Ki la don da ki spah ngut ki khun samla ka Balang Catholic, ki la wan ban iashimbynta ha kaba sdang ka 3rd Youth Convention 2020 ne ka jingiakynduh lang kaba shisien shisnem bad kaba la sdang myn hynnin ka sngi hapoh ka skul St. Mary’s Secondary School, kaba don ha shnong Nongkhrah, Ri Bhoi District. 

Ia katei ka Convention, kaba la pynlong da ka Shillong Archdiocese Catholic Youth Movement (SACYM) Zone (VI) ha kaba ka la pynlong khnang ia katei ka jing iakynduhlang, ka long ban wanrah ia ka jingshitrhem ha ka jingngeit ha ki para samla bad khamtam eh na ka bynta ban wanrah ia ka bha ka miat ha iing ha sem, ha shnong ha thaw bad hapoh ka imlang sahlang, namar ka lawei ha ka imlang sahlang ka shong ha ki khun samla. 
Ha katei ka Convention ki samla ka Balang Catholic, ki la don da ki spah ngut ki samla na ki 4 tylli ki Parish ka Balang Catholic ha Ri Bhoi, kiba la wan ban iashimbynta bad lyngba katei ka Convention, la iohi ba ki bun bha ki samla ka Balang Catholic, ki la pynpaw ia ka khmat kaba phuh samrkhie bad jingkmen, namar ba ki la ioh ia katei ka lad ban iakynduh bad ki para samla na la ka jong ka Balang bad khamtam eh na ka bynta ban iakren bad phylliew jingmut halor shibun kiba iadei bad ka bha ka miat ha ka imlang sahlang, kata nalor ka kam shakri Blei. 
Kiba la donlang ha katei ka Convention, la sakhi da ka jingdon u Bah Mayraldborn Syiem, MLA ka Nongpoh, nangta u Fr. Agustine Koottala, Parish Priest Nongpoh, u Samla F. Syiemlieh, President ka SACYM Zone VI, ki Sisters, ki Rangbah Balang Catholic, ki Tymmen Basan na ka Balang Presbyterian lem bad kiwei. 
   Na kiba la ai jingkren ha katei ka sngi, kiba kynthup ia u Bah Mayraldborn Syiem bad u Fr. Agustine Koottala, ki la pynpaw ia ka jingkmen, ban iohi ba ka SACYM Zone VI, kaba la lah ban iaibteng na ka bynta ban pynlong ia katei ka Convention, kaba long ruh kaba donkam bha ha kane ka juk kaba mynta. 
   Ki la ong ruh, ba ka bha ka miat ha ka shnong ka thaw bad ha ka imlang sahlang, ka shong ha ki smala, namar ki samla ki long kum kita ki atiar bad kum ki nongwanrah jingsuk ha ka imlang sahlang.