Shim bai kali tam ki sawkhmut

Shillong, 13 Naitung:
Ka Hynniewtrep Peoples Federation ( HPF) Mawlai Circle ka la kynnoh ba ki kali saw khmut ki la shim tam ia ka dor bai kali na ki paid bah. Katei ka seng ba kitei ki kali sorkar kiba la tip kum ka Shillong Public Transport Service (SPTS) bad Shillong Supplementary Public Transport Service (SSPTS) ki la shim palat na ka dor ba ka sorkar ka la buh. Ki nongialam katei ka seng ki la leit ruh ban ia kynduh ia ka myntri ka tnad pynroi sor ka kong Ampareen Lyngdoh ban ia kren halor katei ka mat bad ki la dawa ban tuklar ia katei ka jingshim tam bai kali kitei ki sawkhmut.
Katei ka seng ka la ong ruh ba ka jingshim palat pud kitei ki kali sawkhmut ka la ktah ia ki paidbah ba duk, bad bunsien ka daw ba ki ai ha ka por lum bai kali ka dei beit ba kim don pisa khutia, ong u President katei ka seng u bah Kitboklang Lyngdoh. Ka HPF ka la kynnoh ruh ba haba shong kali na Mawlai nongkwar sha Nawlai nonglum kaba jngai tang 150 mitar ki sawkhmut ki la dain beit da ka dor T.10 tyngka marwei na ki paidbah, katba ha ka jingshisha ka dei tang T.5 tyngka.
Kila ioh ei ban khlong na u paidbah T.5 tyngka tang da kaa shu ai daw bym don khutia , ong biang u Lyngdoh uba ai jingmut ba ka sorkar ka dei ban pynmih da ki kynja slip khnang ba ki paidbah ki lah ban ioh biang ia ka pisa jong ki lada jia ba kite ki sawkhmut kim don pisa khutia.