Ki lanot ki la kham tngen, ka shnong ka dang dum ha Nonglum Pynhiar khaw sa u MDC

Ki lanot ki la kham tngen, ka shnong ka dang dum ha Nonglum
Pynhiar khaw sa u MDC
Shillong,15 Jymmang:
Ki nongleh isynei ki la noh jingiarap sha ki lanot kiba la la shah lynshop ha u Kyllang ha ka taiew ba la dep ha Nonglum , bad ki la wan pyntngen ia ki longing kiba la ngat ha katei ka jingjia ryngkat ki jingai jong ki, Mynta ka jingsngewsih ki lanot ka la kham tngen, namar ka jingpyntngen ki lok ki jor bad ki ba ieid ba thoin jong ki, pynban watla ki lanot ki la kham tngen hynrei ka shnong pat haduh mynta ka dang shongdum namarba ki bor ba dei peit ia ka bording haduh mynta kim pat leh eiei halor ka jingkhyllem ki post ilektrik bad ki jingdkut ki sainar ilektrik ha katei ka shnong.
Haba khein haduh mynta , ki lanot katei ka shnong ki la ioh pdiang jingiarap haduh 30 byrni u khaw , bad 11 ban ka tin. Kham ha shuwa ka KSU Ri-Bhoi ka la hiar sha katei ka shnong ban ai jingiarap 4 ban ka tin bad 10 byrni u khar katba ka RBYF pat ka la ai jingiarap 7 ban ka tin, bad mynta ka sngi u MDC ka Umroi u bah Albinus Lyngdoh u la hiar sha katei ka shnong ban noh jingiarap haduh 20 byrni u khaw, bad ia kitei ki 20 byrni khaw u MDC u la aiti ha u Rangbah shnong ka Nonglum u bah M.Mawlong ban sam sha kitei ki longing kiba la ngat ha ka lanot, ha katei ka sngi ba u MDC u la aiti ia kitei ki 20 byrni khaw la ia don ryngkat lang u Rangbah shnong ka Umtangling u Kapten Kharthangmaw, bad sa ar ngut ki Rangbah shnong jong ki shnong ba marjan.
Na ka liang u MDC u la ong ba watla ka long ka jingai kaba rit hynrei ka long pat ka dak ka jingsnohkti lang kum u nongmihkhmat ka thain, la ha ka sngewbha ne ka sngewsih ban ia don bynta lang bad ki paidbah.
Kham ha shuwa u nongthohkhubor u la ioh jingtip ba naduh ba khyrwit u kyllang ha katei ka shnong, ka shnong baroh kawei ka la hap ban shongdum namar ba ka tnad MeECL kim pat wan pynshna. U nongthohkhubor mynta ka sngi u la ia kren bad u Rangbah shnong ka Nonglum halor ka bording ha kaba u bah Mawlong u la iathuh ba haduh mynta ym pat lum pat lang tang ia kito ki sainar kiba phriang ha madan ruh, u la ong ba ka ophis jong ka MeECL ka la ong ba ki nongtrei ki dang bunkam ban trei ha kiwei pat ki jaka ba la jia kaba kum kane ka juh ka jingjia. U bah Mawlong u la iathuh ba haduh mynta katei ka tnad kam pat lum pat lang wat ia ki sainar ba la saphriang ha madan bad ki post ba la khyllem, u la iathuh ba ka Nonglum ka hap hapoh ka jingpeit ka tnad ba na Umiam ( Damsite). Kham hadien haba ia kren bad u MDC u la ong ba ki bor ka tnad MeECL kin hiar lashai ka sngi sha katei ka shnong ban leh

ia kaba donkam.
Lah ban pynkynmaw ba ki la don haduh 26 ing tang ha nonglum kiba la sha pynulor ha u Kyllang ha ka 8 tarik mynta u bnai, kynthup 18 ing ha Mawlong, 7 ha Umtangling bad 1 ha kawei pat ka dong kaba hap ha ka shnong Nonglum.