Shiliang ka ngab bad shiliang ka khlieh, un khap shniuh, haduh ban da ioh long myntri rangbah

U Kappera Srinivasulu, u nongialam ka TDP, ula shah rem ha ka elekshon ha ka Nellore corporation bad utei, ula khi, ia la u jong u tmain tang shiliang ka ngab bad u shniuh ruh tang shiliang ka khlieh bad ula pynbna ruh, ba un sa iai bteng ban leh kumta nangne shakhmat.

U Srinivasulu, ula bam smai ruh ba naduh mynta, un iai bteng ban khap tmain tang shiliang ka ngab jongu bad katei kan dang iai bteng haduh ba u nongialam ba heh duh ka TDP, U Chandrababu Naidu, un wan phai biang, kum u myntri rangbah ka jylla Andhra Pradesh. Ym tang katta, hynrei utei u rah ruh ia ka sleit, ha kaba ula kyrpad ia ki paidbah, ba kin jied biang ia U Naidu, kum u myntri rangbah ka jylla, ha ka jaka jong u YS Jaganmohan Reddy.

U Srinivasulu, u kam ba ka seng synshar YSRCP, ka don bynta ha ka jingthep vote tuh bad nangta, ba ki pyndonkam ruh ban thied vote da ka bor jong ka pisa ha Nellore.

Ha kajuh ka por, U Naidu ruh, ula mih mynta ka sngi, na iing dorbar jylla, da ka jing iam pangnud, ha kaba ula dep pynbna, ba un nym rung shuh satia ha iing dorbar, haduh ba kan da kut kane ka aiom, kaba mynta, hynrei, un sa wan phai biang, tad ynda, un shah jied biang, kum u myntri rangbah ka jylla.