“Shidorjon ki Khubor Khristmas” ki nonghikai Synod Kolej

Shillong, 11Nohprah:
Mynta ka sngi, u Pastor GLP Gadew ka KJP Synod u la pyllait paidbah ïa ka kot ba la jer kyrteng “Shidorjon ki Khubor Khristmas” ba la thoh da ki nonghikai jong ka Synod College, u Pastor u la pyllait ia katei ka kot ha ka jingïaseng rakhe Khristmas ba la pynlong ha katei ka Kolej ha ryngkat ka jingiadon lang jong u Principal, ki nonghikai bad ki khynnah pule.
Katei ka kot ka dei ka thup kaba don khat-ar tylli ki khubor Khristmas ha ki phang bapher bapher shaphang ka Khristmas ha ka dur jong ki artikel ba la noh synñiang da ki nonghikai jong katei ka kolej. La pynbit bynbiang ïa katei ka kot da u Dr.C.R. Lyngdoh, u babu A.W. Rani bad u babu K. L. Buam kiba dei ki nonghikai ha katei ka Kolej.
Haba kren kum u kongsan ha katei ka jingïalang, u Pastor Gadew u la ïaroh ïa ki nongthoh jong katei ka kot kaba la mih ruh ha ka por kaba biang ba ki briew ki dang pynleit jingmut ban rakhe ïa ka Khristmas. “Kane ka kot ka long kum ka jingaisngewbha Khristmas bad ka dei ruh ka jingaisngewbha kaba neh bad ba don jingkyrkhu”, ong u Pastor Gadew. U la bynrap ruh da kaba ong “Ka long kaba suk ban rakhe Khristmas hynrei kaba eh ban kren ïa ka khubor Khristmas bad kham jwat shuh shuh ban thoh shaphang jong ka bad kaba eh tam ka long ban im ïa ka khubor”. Ha ka jingkren pynkut, u kongsan u khot u wer ïa baroh ki samla pule jong katei ka kolej ryngkat ki nonghikai ban im ïa ka jingim kaba ïadei bad ka mon jong U Blei uba long U Trai jong ka Khristmas. U la kyntu ruh ïa kitei ki nonghikai ba kin ïai bteng ïa ka jingpyrshang jong ki ban nang sei shuh shuh ki symboh jingthoh kum kitei ki ban tei ïa ka imlang ka sahlang bad pynïar ïa ka thoh ka tar Khasi ha ka dur ki jingthoh ha ki kot niam. Ïa ka kot la pynmih da ka Ri Khasi Book Agency and Publisher ha ka dor 70 tyngka kawei bad lah ban ioh ïa ka na ki dukan kot ha Synod Complex market, Shillong.