Nongpoh: Mynta ka step ha ka por 1 baje ei ei, ki Pulit ka Byrnihat Police Outpost, ki la ioh ban kurup shibun ki tiar pynbthei na kawei ka kali TUV 300 kaba don ia u number AS-01/BV-8065, kaba mih na ki thain Lad Rymbai da ka jingthmu ban hiar sha Guwahati.
Ka tyllong khubor kaba la iohlum, la ong ba ki Pulit ka Byrnihat Police outpost, ki la ioh ban kem ia katei ka kali kaba kit ia ki tiar pynbthei, ka dei lyngba ka jingpyntip da ki Pulit ka Nongpoh Police Station, ki la iathuh ba la don uwei u nongniah jong kawei ka kali ba um shym la sngeh ha ka por ba ki Pulit, ki la pyrshang ban bat ha Nongpoh, ha kaba u la pynher stet pynban ia ka kali, tang mar ia iohi ba ki Pulit ki pyrshang ban pynsangeh ia ka.
Haba katei ka kali kam sangeh ha ka por ba bat ki Pulit Nongpoh, kumta ki la pyntip noh sha ki Pulit Byrnihat Police outpost, haba kaba ki la ioh ban pynsangeh ia katei ka kali bad haba ki la talasi hapoh katei ka kali, la lap shibun ki tiar pynbthei, kiba kynthup ia ki Aluminum Instantaneous Electric Detonator Class-6, Division-3= 2044 bad haduh 4027 tylli ki Neo Gel (Gelatine Sticks).
Ki Pulit hadien ba ki la bat ia ka kali, ki la kem ruh ia u Nongniah uba la tip kyrteng kum u Moynul Hoque na ka shnong Rangaswari, ka shnong kaba hap ha Kamrup District jong ka jylla Assam.
Hadien katei ka jingiohbat da ki Pulit ka Byrnihat Police outpost ia katei ka kali kaba la kit shibun ki tiar pynbthei, la iohi ba ki heh Pulit na Shillong, ki la hiar sha Byrnihat na ka bynta ban tohkit halor katei ka jingjia.
Phi don ban ong eiei?