Shibun bah ki Bilor kyiad, ioh lum ka JNV na Syntu Ksiar

Jowai, 3 ‘lyngkot:
Ka sengbhalang- ka Jaintia National Volunteer (JNV) ka la pynlong ia ka jingpynkhuid ia ka Syntu Ksiar ha ka sngi ba-ar ha kaba ka la ioh ban lum bad tam da shibun bah ki bilor kyiad bapher bapher nalor kiwei pat ki jakhlia kaba pynjaboh bad pynjakhlia bad pynsniew dur ia katei ka jaka kaba itynnad- ka jaka jngoh kai bad ka jaka bam piknik.
U samla Heibor Pariat, uba dei u Finance Secretary ka seng u la ong ba ka jingthmu ba kongsan eh ka jingpynkhuid ia kane ka jaka ka long ban hikai ia baroh kiba wan bam khana lehkmen leh sngewbha sha kane ka jaka ba kin pynneh pynsah ia ka jingitynnad jong kane ka jaka da kaba leh khuid.
Ka jingbret pathar ia ki bilor kyiad bad ia kiwei kiwei jakhlia ha kane ka jaka ka wanrah ia ka jingsniew dur ia kane ka jaka baroh kawei.
U samla Pariat u la kyntu ia ki paidbah kiba wan ban khana sha katei ka jaka ban kin nym bret pathar ne pynpait pathar ia ki bilor bad ia ki jaboh jabain, hynrei kidei ban buh bha ia ki ha ki jaka kiba la seng ka la buh dak da kaba ker dieng.