Shibnai ther u slap khlem pud ha Sohra bad Mawsynram rTam ka Mawsynram ia ka Sohra ha u jylliew

Shillong, 3 Naitung:
Ka tnad kaba thew ba woh ia ka bor mariang ka tnad Meteorology ka la lap ba baroh shibnai kynthih ha u jylliew, 2015 kam don shi sngi ruh ka sngi ban ym hap slap ha Sohra bad Mawsyn ram. U Khlieh jong katei ka tnad u Vijay Kumar Singh haba kren sha katto katne ki lad khubor mynta ka sngi u la ong ba kitei ki ar tylli ki jaka kiba hap hapoh East Khasi Hills District ki dei ki jaka ki ba jur slap tam ha ka pyrthei haduh ba thoh ia kane ka khubor. Kat kum ka jingong u Singh u la ong ba kitei ki ar tylli ki jaka ki mad ia ka jingjur slap kaba 4300 mm tam tang ha u bnai jylliew, 2015. U Singh u la ong ba ha u jylliew ka Sohra ka la ioh mad ia u slap uba heh haduh 4355.5mm kaba dei ruh ka sien kaba nyngkong hadien ka 20 snem ba katei ka shnong ka la ioh mad biang kum utei u lapbah. Lah ban pynkynmaw ba dei ha u snem 1995 ka Sohra ka la ioh mad ia u slap uba jur tam uba katkum ka jingkhein jingdiah ka long haduh 4710.9 mm.
Ka Mawsynram pat ka shnong kaba don mar pyrshah ia ka Sohra, la ong ba ka khamtam ia ka Sohra ha ka jingjur ha u bnai jylliew 2015, katkum ka jingthew jong ka Regional Meteorolgical Department Centre jong ka Indian Meteorological Department kaba don ha Guwahati ka la ong ba ka Mawsynram ha u bnai jylliew ka la mad ia u slap uba heh haduh 4781.2mm.
Ki bor ba peit ia katei ka tnad ki la ong ba lada shim ia katei ka jingkhein ka Mawsynram ka la dei ban ioh ia ka nam kum ka shnong ba jur slap tam ha ka pyrthei, hynrei ka don pat ka jingiakren namarba katei ka jingkhein jong ka kam long ryntih ha baroh shi aiom kum ka Sohra. Kawei pat ka daw la ong ba ha Mawsynram kam don ka ophis jong ka tnad ka thew ka woh ka ban shim ia ka jingkhein kaba thikna hynrei la shim ia ka jingkhein tang da ki briew jong ka sorkar Meghalaya kiba ki heh jong katei ka tnad ki la ong ba ki dei ki briew ki bym pat don jingtbit ha katei ka kam. Ka tnad bat hew ba woh mariang ka la antad ruh ki dang don kiwei pat ki shnong kiba don marjan bad ka Sohra ne Mawsynram kiba la mad ia u slap uba kham jur hynrei na ka daw ka jingbym biang ki tiar ki tar ban leit shim jingthew na manla ki shnong la shu shim kyllum beit tang ia kitei ki ar tylli ki shnong.