Shibnai sahkut ka twa hapdeng surok, ym don ba pynkhih

Shillong, 7 Lber:
Katba dang iaid lynti ban leit sha Maw-tajuh -Khad-Ar Shnong haba la poi ha ka jaka ban rung sha ka shnong Kshaid (12 Shnong) une u nongthohkhubor u la iohi ba ka don ka jingtwa khyndew kaba la jur bha ha kaba ki mawbah, maw rit bad ka khyndew kaba la twa ka la khang lynti sbuk ia ka surok ban kiew sha ka Shnong Kshaid kaba hap ban iaid lyngba ka shnong War-War.
Une u nongthohkhubor u la kylli na ki briew jong katei ka thaiñ, shaphang katei ka jingjia bad ki la iathuh ba ka la jia la jan dap shibnai mynta; hynrei haduh mynta ki bor sorkar kim pat leit ban pynkhih lane ban weng ia katei ka twa kaba la khang sbak ia ka surok ban rung hapoh shnong.
Ki briew jong katei ka thain ki la pynpaw ka jingsngewsih namarba ki bor ba dei peit kim shym la shimkhia ban weng noh ia katei ka jingeh u paidbah bad ki la kren iam rem da kaba ong ba ki dei ki nongkyndong ym don ba phai khmat sha ki.
Uwei na ki rangbah haba kren bad u nongthohkhubor u la ong ba bunsien la ju iohi ba haba don kino kino ki jingjia twa khyndew ha ki jaka sor ne khapsor la ju iohi ba mar-mar tang da ki minit ne kynta la phah ia ki puh shilum ban leit pynkhuid bad pyllait lynti, hynrei katei ka jingjia hangtei ka la jia la shibnai mynta hynrei ym don ba phai khmat satia.