“Shibnai nga la sah ha Amerika, ym don jingiapher ha sor bad nongkyndong”

Shillong, 9 Nohprah:
U bah Witting Mawsor, u MLA ka Mawshynrut u la long u kongsan ha ka jingialang kyrpang ban ia phylliew na ka bynta ban pynlong ia ki shnong ha Megha laya kum kita ki shnong kiba leh smat leh sting bad ki briew jong ka ruh kin long kiba smat ba sting. Ia katei ka jingialang la pynlong da ka Meghalaya Economic Association (MEA) mynta ka sngi.
Haba kren ha katei ka jingialang kum u kongsan u bah Witting Mawsor u la ong ba ka eh than ban pynlong ia ki shnong ne ki briew kiba smat ha ki nongkyndong jong kane ka jylla ha kaba ka roi ka par bad ka jingim ki nongsor ka ia pher bak ly bak bad ki nongkyndong. “Wat pat phohsniew ba phin long kata ka shnong kaba smat ne ki briew kiba smat haba tang ka surok kaba dei u bud lum jong ka roi ka par ruh kam don kaba biang, ki briew ha nong kyndong ki hap ban iaid kjat kumba 2 ne 3 kilo mitar ban leit tong umdih” u la ong.
Shuh shuh u bah Mawsor u la ong ba haba phai lei sha ki jaka sumar ka don ka jingiapher sha bneng sha khyndew ha sor bad ha nongkyndong, “Ha nongkyndong ki doktor, ki nos kim poi thikna sha ki jaka sumar,ki briew kiba duk kim lah ban leit sha sor ban phah sumar. Ka jingbym biang ki jaka leit bar ne painkhana ha nongkyndong ka pynkha ki jingpang ba lai phew jait” u la ong biang. U la kdew ruh ia ka jingbym biang ki jaka pule ha ki thaiñ nongkyndong bad dei halor katei ka daw ba kiba bun bah na nongkyndong ki wan ban pynkhapngiah ha sor Shillong.
“Shibnai tam nga la sah ha United States of America bad nga shem ba kam don jingiapher ha sor bad ha nongkyndong,kiei kiba don ha sor ha nongkyndong ruh ki don” ong u bah Witting haba kyntu ia ki paidbah ba kin phai khmat sha kiwei pat ki kam ym ban shu ia beh tang ia kajuh ka kam. U la pynshlur ia ki paidbah kane ka jylla ba kin phai khmat sha ki kam rep kam riang lane ki kam pynmih jingbam, lane ban oh shrong oh shrup ne ban saindur lane ban phai sha ki kam jngohkai pyrthei, bad da kaba sdang da kitei ki jaitkam lah ban poi sha uta u pud ba ngin khot kum ka shnong kaba smat, bad u la kren diaw mynsiem ruh namar ka jingbun sa tang ki karkhana ha kane ka jylla kaba la pynjaboh pynban ia ka mariang.