Shibnai ai por ka KSU, ban pynduh jait ia ki trok bar Jylla sha War Jaintia

Shillong: Ka Khasi Students’ Union War Jaintia, hadien ba ka la iaid la bun bnai, na ka bynta ban beh ia kali bar jylla kiba don ha ki thain War Jaintia kiba kamai beain bad kit mawshun sha Bangladesh; kumta ki Nongkhaii ki la khot ia ka Seng sha ka miej jingiakren ha ka 11tarik Jymmang 2019 ha ka por 5:30 janmiet hapoh I.B P.W.D ha Dawki.
Ha kane ka jingialang la iadonlang u President jong ka War Jaintia Circle Samla Laitphar Syngkrem, Samla Ohibait Dkhar President KSU JHDU, Samla Leningrad Tariang Organising Secretary KSU JHDU, Samla Kindly Khyriem Finance Secretary KSU WJC, Samla Lurman B. Talang General Secretary KSU WJC bad la ia don ryngkatlang bad u Officer Incharge jong ka Dawki Police Station.
Ha kane ka jingialang na ka liang ka Seng, la kren da u Samla Laitphar Syngkrem bad Samla Ohibait Dkhar, ha kaba ia kane ka mat ki la ialeh naduh 2018, namar ka buh jingeh kaba khraw ia ka thain War Jaintia baroh kawei lyngba ka jingbun kine ki trok bar jylla. Ha kane ka jingiakren la don shibun ki nongkhaii, kiba la pan por na ka seng, namar ba ki la ai pisa (advance) ia kine ki kali ba ki shim na ki bar jylla khnang ba kin lah ban pyndep ia kane jingshimwai. Ki la kular ia ka Seng ba kin ialeh katba lah ban pynduh jait ia kine ki trok bar jylla, lada ka Seng ka aipor ia ki, wat lada dei kiba biang ki kot ki sla ruh kin ym shim shuh ia ki trok ba nabar.
Ka Seng kumba la rai ha ka jingialang ba la dep jong ka ba ki paradoh para snam kiba kamai hapoh ka thain kim dei ban duh ka kamai kajih bad halor kane ka Seng ka la ai por shibnai ia ki Nongkhaii, kumba ki la kular ba ki dei ban pynkhuid noh ia kine ki trok bar jylla hapoh ka thain War Jaintia baroh kawei. Ka KSU War Jaintia ka ai khublei ia u Samla Ohibait Dkhar President jong ka Jaintia Hills District Unit bad baroh ki dkhot kiba la wan iaraplang bad ia ki nongkhaii baroh kiba la pdiang bad kubur ba kane ka ishu, ba shim da ka Seng kadei kaba ktah shisha ka ka Ri bad ka Jaitbynriew baroh kawei, ong ka kyrwoh na u Samla Lurman B. Talang General Secretary KSU WJC.