Shi sngi lynter, dheng kali ka nongbah Shillong

Shillong,17 Rymphang:
Ka jingdheng kali mynta ka sng ka la jubor shaba palat ha kylleng ka nongbah bad katei ka dheng kali ka la jubor wat sha ki thain Upper Shillong ka bym kham ju jia koit ka dheng kali ha kaba la iohi ba naduh na jingkieng Umshyrpi haduh ban da poi ha 6 mer ki kali ki la shu sahkut beit sbak. Hapdeng katei ka jingjubor kali, la iohi pat ha ki rud surok jong ka Umshyrpi la dap mam da ki dukan die bhang bad kiwei pat ki jingdie lehkmen Puja.
La iohi ba naduh na Lai-mer ki khynnah pule jong ka thain upper Shillong ki hap ban hiar na ki kali ba ki shong ban mareh da ka kjat shaduh sha sor; don napdeng jong ki, kiba beh ban thoh eksamin bad don ruh kiba beh ban leit sha ki jaka pule jong ki.
Katei ka jingdheng kali kam shym la neh tang khyndiat kynta, hynrei la iohi ba ka la neh baroh shisngi, bad ha ka por janmiet ka Iew Mawlong ka Motphran, na bimola ban ter ter sha Khyndailad, ki thain ka Garikhana ki kali ki la sahkut lut sbak. Kate ka jingdheng kali kam shym la dei tang ha ki surok bah, hynrei la iohi ruh ha ki surok rit surok shnong ba ki kali ki ia tynruh kat shaba lait thliew ban rung, hynrei la shu sahkut hi sbak, don bun na ki nongleit jingleit kiba leit phai ing biang namar ka jingijli palat ia ka jingkhapngiah ki kali ha nongbah Shillong mynta ka sngi. La iohsngew haba iaid ba ieng, haba shong hapoh kali ia ka jingud ki paidbah ia katei ka jingdheng kali, kaba la pynpulom ia ka jingiakut kam jong ki. Ki la mih bun ki daw antad napdeng ki paidbah ia katei ka jingdheng kali, don kiba kynnoh ia ka Puja die bhang, don kiba kynnoh ia ka pakhang shnong ha ka lah sngi u blei, don pat kiba kynnoh ia ki pulit pyniaid kali bad kumta ter ter.
Katba ha kawei pat ka liang ban teh lakam ia katei ka jingdheng kali, ki pulit pyniaid kali ka nongbah ki la pyntreikam noh da kawei pat ka ain kata ka dei ka ain lajong jong ki nongniah kali, ha kaba ki dei ban bud beit ryntih ba kim dei ban rung ha ki jaka bym shah rung kali, bym die ban iaid ha ka jaka ba dei iaid tang kawei ka kali bad bym dei ban ieng kali ha ki jaka bym dei ban pynieng kali. U SP ka East Khasi hills u bah M.Kharkrang, u la ong ba ki pulit kin peit siar bha ha baroh kiba kum kitei ki jaka ba la mana bad lada lap kin bat ia ki kali kiba pynkhein ain. U bah Kharkrang u la ong ba ki pulit ki la sdang ban pyntreikam ia katei ka ain ha baroh kawei ka nongbah.