Shi snem ha phatok, ia kiba kren lamler ia ka khlam Covid

Shillong: U Deputy Commissioner jong ka West Khasi Hills District, U Bah T. Lyngwa u la pynmih ia ka jingpynbna paidbah ba lada lap ia kino kino kiba pynsaphriang ia ki khubor lamler, shaphang ka jingpang COVID-19 kin shah kem bad yn set ha phatok shisnem ia ki.

Katkum ka jingpynbna kaba la pynmih ha ka 03 tarik u Naitung 2020 la ong ba ka ophis ka la ioh jingtip ba ki don ki briew kiba juh mlien ban pynsaphriang ia ki khubor lamler ha kaba ia dei bad kane ka COVID-19 bad kane ka la wanrah ia ka jingsyier ha ki paidbah ha ki shnong ki thaw ki dong bad ki thain khlem da ioh ia ka jingpynshisha na ka tnad ka koit ka khiah jong ka sorkar jylla.

U la ong ruh ba ka ne ka jingpynsaphriang ia ki khubor lamler ka long pyrshah ia ka Disaster Management Act, 2005 bad katkum kane ka ain ka long ba lada lap ia kito kiba pynphriang ia kum kine ki khubor lamler kin shah kem bad yn set phatok shisnem ryngkat bad ka kuna. Na ka liang jong u DC u la kyntu ia ki paidbah ba kin kiar na ka jingpynsaphriang ia ki khubor lamler.