Shi inshi ngin nym ai jaka, ong ka Assam, Arunachal, Manipur

rHalor ka soskular ka NSCN(IM) bad ka sorkar India
Shillong, 7 Nailar:
Ki myntri rangbah jong ka Assam, Arunachal Pradesh, Manipur, kren bynniaw ba ka sorkar India, kam shym la ia syllok eiei satia bad ki, haba ka ia soi ia ka soskular bad ka seng kaikhlaw NSCN (IM) bad kumta, kitei ki myntri rangbah jong ki Jylla Congress, ki la kren shai ba kin nym ai satia, wat shi inshi ruh ka jaka jongki. Ha kawei pat ka khubor, ka sorkar India, ka kren shai mynta ka sngi, ba kan da don ka jing ia syllok bad ki Jylla ba don mar syndah bad ka Nagaland, ha shwa ban soi ia ka soskular ba pura bad ka NSCN (IM). La iathuh ia katei da u myntri kam poh iing ka sorkar India, U Rajnath Singh, haba u leit ban ia kynduh u myntri rangbah ka Nagaland, U TR Zeliang ha New Delhi. “Ha shwa ban don ka jing ia soi soskular ba pura bad ka NSCN (IM), kan don ka jing ia syllok bad ki myntri rangbah jong ka Manipur, Assam bad ka Arunachal” ong ka khubor, kaba mih na ka jing iakren jong u myntri rangbah ka Nagaland bad u myntri kam poh iing ka sorkar India. La iathuh ba U Singh, ula kren shai sha ki nongialam jong ka NSCN, ba ka jinglum lang ia baroh ki jaitbyriew Naga, ka long ka bym lah satia ban leh, hynrei, kin ai ia ka bor kaba kham khlain ia ki District Council bad kiwei pat ki bor trei kam jong ki paidbah ha ka Jylla.
Ka NSCN-IM, ka la kyntait ia ka jingdawa ri laitluid ha ki khyndiat snem mynshwa, hynrei ka kwah pat ban lum lang ia baroh ki Naga, kiba don ha ki Jylla ba marjan jong ka Manipur, Arunachal Pradesh bad ka Assam. La iathuh ba ka jingai bor ia ka dorbar Jylla jong ka Nagaland, kan don ha kane ka jing ia soi soskular, ka ban long katba kum ka article 371 jong ka riti synshar Ri.