Shi bnai pynsangeh ka Supreme Court, ka mukotduma wah umkhrah

Shillong, 06 Risaw:
Ka Supreme Court ka India  ka la pyn sangeh haduh shi bnai bym dei ban pynpra ia ki iing ha shi lynter ka Umkhrah ha thain Polo, Shillong.
Ka hukum pynsa ngeh ka Kashari ba hakhlieh duh ka ri ka long kum ka jingiarap bad ka jingjop ia kito ki briew kiba iakhun mukotduma pyrshah ia ka Meghalaya Urban Develoment Auhority (MUDA).
Ka thymmei na ka MUDA ka la ong ba ka Kashari Supreme Court ka la pynjlan ia ka hukum sangeh pynpra haduh shi bnai bad ka la ailad ia ka MUDA ba kan thep biang ia ka jingujor.
“Ngi hap ban iakhun beit ia kane ka mukotduma. Mynta ngin pynkhreh ban iaid sha khmat ban thep ia ka jingujor jong ngi”, la ong ka khubor na ka MUDA.
Kane ka jingshah pynsangeh ha Kashari Supreme Court ka long kum u diengpynkiang ia ka MUDA kaba la iakhun ia kane ka mukotduma la slem naduh kham mynshwa.
Lah ban kdew ba ki don haduh 30 ngut eiei ki briew kiba don ha ka jingiakhun mukotduma pyrshah ia ka MUDA kiba kam ia ka jinglong trai ia ki jaka jongki ha ki bynta ka phudwah Umkhrah ka thain Polo.
Ha ka 10 tarik Nailur ka High Court  ka la pynmih ia ka hukum ba dei ban pynpra noh ia ki jingtei beain ha shi lynter ka wah Umkhrah hynrei la hap ban sangeh hadien ba kiba shah ktah ki la kiew sha ka kashari Supreme Court.
Ka  National Green Tribunal (NGT) ha ka  29 tarik Kyllalyngkot mynta u snem ka la bthah ia ka sorkar jylla ba kan weng naphang ia ki jingtei beain ha shi lynter ka wah Umkhrah bad Umshyrpi.