Shillong: Ki nongtrei ka EMRI 108, hapoh ka lama ka Meghalaya EMRI Workers Union (MEMRIWU), ki la dawa na ka bor pyniaid ba ka dei ban pynbeit ia ka jingshah ban khia jongki kaba lah ban ktah ia ka jingshakri ia ki paidbah.
Mynta ka sngi, hapoh ka jingialam u Bah Roipar Raswai u president bad ka General secretary Susana Lyngdoh bad la aiti ruh ia ka dorkhas.
Haba kren mynta ka sngi, sha ki nongthoh khubor, u bah Roipar u la iathuh ba katkum ka ain, ki dei ban trei tang 196 kynta ha ka shi bnai hynrei namar ba duna nongtrei, ki la shah pyntrei haduh 288 kynta shi bnai kum ki masi bordi.
“Kane ka jingban khia ka kam, ka la ktah ia ka jingshakri jong ki ia ki paidbah namar ba don ki khep hap leit shaw briew haduh lai ne saw sien ha ka shimiet”, la ong u bah Roipar.
U la iathuh ba kiwei pat ki mat ba ki dawa ki don shibun kynthup ka jingneh ka jingsiew kaba la slem ka bym iahap shuh ha kane na ka jingrem ki mar ki mata ha iew ha hat namar ba maki, ki dei kiba la hap ha ka kyrdan ki nongtrei ba la tbit. Kawei kaba ki pynsngew ka dei ka jingpynduh bainon lada shim shuti ne pang ruh.
U la ong katkum ka rukom ki kali 108 dei ban shakri 24 kynta, hynrei dei kumba 7 tylli eiei kiba shakri tang 12 kynta.
Katba ka kong Susana ka la ong ba ki la thaw ia kane ka kynhun namar ba ki la mad ia ki jingeh ki jingdkoh ha ka bor pyniaid na ka bynta ban peit lem ia ki nongtrei kiba don kumba 200 ngut 108.
“Ngi kwah ban ai ka jingshakri kaba bha bad ngi thaw ia ka seng namar ba ka don ka jingdkoh ha ka bor pyniaid bad dei ban pynbeit ia kine ki jingdawa”, ka la ong.
Ka la ong ba ki bor pyniaiud kim dei ban shu pynkynriah kam pathar sha ki jaka ba khlem tip namar ba kane ka la wanrah ka jingthut bad ka jingeh ia ki ban shakri ia ki paidbah namar bym sngewthuh ktien kum ki Khasi la phah sha Garo Hills.
La iathuh ba haduh mynta ki don kumba 43 tylli ki kali 108 ba shakri ha ka jylla hynrei kiba bun ki dei kiba la rim bha kiba la donkam ban bujli da kaba thymmai. Tang ha ka ophis ka EMRI kaba don ha Lawmali, ki don kumba 18 tylli kiba la itlot bad lah ban nym lah iaid shuh.
Haba pyrshang ban leit iakren bad ki bor pyniaid, hynrei kila kyntait ban iakynduh ia ki lad pathai khubor.