Shet shukor ka Sorkar Meghalaya ia ki nonghikai Deficit

Babu Kular Khongjirem

Ka jingkuman jong kane ka sorkar MDA ia ki mat ba donkam eh jong ki nonghikai skul naduh ki nonghikai Adhoc,SSA,Deficit pattern haduh ki nonghikai Deficit ka la pynduh mynsiem shisha ia ka lawei jongki bad khamtam eh ia ka jingnang jingstad bad ka thoh ka pule ha ka jylla.

Ki don bun bah ki hok ba ki nonghikai Deficit ki dang dei hok ban ioh hynrei haduh mynta ki ain ki kanun bad ka rukom pyniaid ia ki bor skul ki dang sah kut sah ha ka jinglong umdum. Ka arrear ba dang sahteng(pending arrears) jong ka tulop thymmai(revised pay) kaba la khmih lynti ba ka sorkar kan siew noh sa ia ka 3rd installment(25 pc)naduh u bnai December 2021,pynban ka sorkar ka shu thok kai ia ki nonghikai deficit. Kane ka sorkar ka leh shiliang khmat bad leh bym byn hok ruh namar,ka 3rd installment ka la dep siew ia ki nonghikai deficit ha ki kyrdan Primary/Upper primary schools katba ia ki Secondary bad Higher Secondary pat ka dang pynsahteng ban siew haduh mynta.

Mynta te, ym donkam siew installment shuh hynrei ka la dier palat ka por ia ka sorkar wat ban siew lut baroh(full amount).Lada ka sorkar kan dang pynslem bad pynsahteng biang,,ka Election Commission of India kan sa pynbna noh ia ka tarik ban long election bad ka Model code of Conduct kan treikam ha Meghalaya.Lada jia shisha kumta,ka arrear ki nonghikai kan sa poi haduh kawei pat ka sorkar thymmai.Lada kane ka sorkar MDA kam lah pyndep ia kane ka arrear ba dangsah,kata,ka la shah rem(failed) hakhmat ki nonghikai bad ka thoh ka pule ha ka state jongngi.

Ka jingpynkiew ia ka Grtuity(DCRG) kaba la tyrwa naduh u snem November 2018 na u Under Secretary Education Dept sha u Director of School Education and Leteracy(DSEL) bad u Director pat u la phah sha baroh ki DSEOs ha ka 21st February 2019 bad ki DSEO pat ki la phah sha baroh ki skul ha ka 7th May 2019,kane ruh ka la kylla kamkai lut khait mynta.Ki nonghikai deficit ki dang ioh hi da kajuh ka dor 3.5 lakh kaba dei ka dor 16/17 snem tam mynshwa.Ka official order/notification jong ka sorkar ia ka Gratuity thymmai ba 10 lakh ka dang sdien ldui mynta ha Secretariat. Sa kawei pat ka jinglehbein(deprive)jjong kane ka sorkar ka Meghalaya ia ki nonghikai Deficit kalong ba ka khlem ai (grant) ia ka shuti ioh khun ki nonghikai khynthei(Ladies’ teachers).

Ha ka jingshisha,ka kyndon kaba 36 jong ka ‘The Meghalaya Aided Secondary and Higher Secondary Schools Employees Rules,2018’ ka la thoh shai ba dei ban ai(grant) maternity leave ia ki nonghikai kynthei haduh 3/6 bnai hynrei haduh mynta ka jingpyndonkam ia ka maternity leave ka iapher na kawei ka skul sha kawei pat kat kum ki bor pyniaid jong ki skul bapher bapher.Ki DSEOs kim dei shuh ban khang lad ia ki nonghikai kynthei kiba apply maternity leave hynrei ki dei ban phah beit(forward) sha ka Education Dept.khnang ba leh ia kaba donkam.

Lada ka sorkar kam pdiang(not entertained) ia ki ain ba ka thaw hi ma ka,kata,ka Kashari(Courts) ka lah ban tuklar ban pynioh(grant legal redressal) ia ka hok jongki nonghikai ba ki dei hik ban ioh(deserving rights). Ki dang bun bah ki hok jong ki nonghikai ba ka sorkar ka lehkaim kai kum ka jingsiew tulop ba man u bnai,ka retirement benefit scheme,pension,ka MCPC,ka medical re-imbursement,etc kiba ka jingphohsniew jong ki nonghikai kam pat long kam satia.Lano pat kane ka sorkar kan pyrkhat haba sa tang khyndiat bnai kan pyrkhat noh sa ia ka Election ioh shah rem khlem rain pynban ha ka bor jong ki paidbah ba bun.