Shillong 5 Lber : Ka tnad pule puthi ka Sorkar Jylla shen kan sa pynmih ia ka jingpyntip halor ka jingpdiang ia ki nonghikai kiba la pyndep ia ka 18 bnai Diploma Course kaba la pynlong da ka National Institute of Open Schooling (NIOS) lyngba ka Open and Distance Learning (ODL) na ka bynta ka D. El. Ed ban kin apply ia ki kam hikai ha ki skul Sorkar i akane ka iathuh da u President ka Meghalaya SSA School Association (MASSA) u bah Aristotle Rymbai.
Mynta ka sngi Ka tnad pule puthi ka Sorkar Jylla Mynta ka sngi ka la lum ia ka jingialang bad ki Kynhun nonghikai SSA ban ia kren halor ki sienjam ba ka Sorkar kan shim hakaba ban weng ia ki jingeh Jong ki nonghikai SSA ha ka ba la wan shim bynta da ki nonghikai kiba don hapoh ka lama Jong ka Meghalaya SSA School Association (MSSASA) ka All Meghalaya SSA School Teacher Association (AMSSATA ) bad ka Fourth Teachers Association (FTA) .
Haba kren sha ki ladpathai khubor hadien kane ka jingialang u bah Aristotle Rymbai u la ong ba ha kane ka jingialang, ka Sorkar ka la pyntip ba ka don ka jingthmu ban pyniasoh ia ki nonghikai SSA sha ki nonghikai Sorkar, bad halor kane ka tnad kan sa pynlong da ka jingialang bad baroh ki Sub – Divisional School Education Officer (SDSEO) Jong baroh ki District ban phah lum jingkhein na baroh ki SSA School, ban pynurlong ia kane hakaba la buh por ban pyndep ha ka 15 Tarik Iaiong 2025 .
U bah Aristotle u la iathuh ruh ba ka tnad ka la pyntip ruh ba shen ka Sorkar kan sa pynmih da ka jingpyntip ba ki nonghikai kiba la pyndep ia ka 18 bnai ka D. El.Ed ba la pynlong da ka NIOS , ki la lah ban apply ia ki kam nonghikai ha ki skul Sorkar.
” Kum ban shu kdew hangne ba na ka liang ka Supreme court ka la pynmih ia ka hukum ba ia ki nonghikai kiba la pyndep ia ka D.El Ed ba la pynlong da ka NIOS Kim long ban apply na ka bynta ka kam Sorkar , hynrei ha u bnai Nohprah 2024, ka Supreme court ka la pynmih biang ia ka hukum ba ki la shah ia kane , Kumta katkum kane ka hukum na ka liang ka NCTE ka la phah sha baroh ki secretary Jong ka tnad pule puthi jong ki Jylla ki dei ban pynmih ia ki jingpyntip , ba ki ba la pyndep ia ka 18 bnai D.El Ed da ka NIOS ki la pynlong ban apply ia ki kam sorkar ” u la ong.
U la bynrap ruh ” ha kane ka jingialang u Secretary u la pan por haduh 15 Tarik u Iaiong 2025 , ha kaba iadei ban pynbeit halor ka jingpynkiew ia ka tulop jong ki nonghikai SSA bad ngi la iakren ha ka jingialang ba lada ka long ka sorkar kan wanrah da ka Pay scale ,Ka Kynhun ki nonghikai SSA kan sa shim ia ka rai ba kan tyrwa ban siew kat Kum ki Adhoc Enchantment lane da ka Pay scale Enhancement, sha ka sorkar , bad ngi mynta ka sngi hi ngi la dep ban pynpaw ba ngi kwah ia ka pay scale Enhancement”.
Halor Rationalisation, u bah Rymbai u la iathuh ba na ka liang u Commissioner Secretary u la pyntip ba na ka liang ka Sorkar Jylla ka dang pynkhreh iakane ha kine ki bnai ba la dep , na ka liang ka kynhun ki nonghikai SSA ka la kyrpat ia ka Sorkar ban pynkloi kat ba lah ban pyndep noh ia kane namar ba la bun ki skul ki la sdang ka jinglong skul.Ka seng ka la ai ruh ka jingmut ban pyniasoh ia ki nonghikai SSA ha kito ki skul ki ba marjan, Cluster Research Centers (CRCs) bad lada ym don ki skul kiba Jan bad ki CRC ki lah ban rah sha ki jaka ki ba jan ki ICRC .
Phi don ban ong eiei?