Shen yn sa plie, ia ki iing bishar jong ka KHADC ha Nongpoh, Nongstoin bad Mawkyrwat:Titostarwell

Shillong: U Chief Executive Member jong ka Khasi Hills Autonomous District Council u bah Titosstarwell Chyne, haba jubab ia ka jingiatai halor ka mang tyngka jong ka KHADC na ka bynta u snem 2020-2021 u la iathuh hapoh ka iing dorbar ba kum shibynta ban pynsuk ia ki paid bah kiba donkam ha ka ingbishar jong ka KHADC, shen ka council kan sa plie noh ia ki iing bishar ki ba don ha Nongpoh, Nongstoin bad Mawkyrwat.

U CEM u la iathuh ba ka KHADC kan dang pynkhlain shuh shuh ia ki shnat trei kam jong ka KHADC ha Nongstoin, Nongpoh bad Mawkyrwat da ka ba phah ia ki Junior Engineer sha kitei ki jaka, ar sien ha ka shitaiew ban ia kynduh ia ki paidbah ha kaba ia dei khamtam eh ia ki Bill jong ki jingtrei kiba ka KHADC ka pyntrei.

Kumba ka long mynta ki kam ki ba kitei ki ophis jong ka KHADC ki peit ki long tang ban shim ia ka khajna na ka kamai kaba la tip kum ka Professional Tax. La iathuh ruh ba ia ka ophis jong ka KHADC ka ba don ha Mawkyrwat shen yn sa plie noh.

Haba ia dei bad ki Hima, u CEM u la ong ba ka EC ka kwah ban iohi ba baroh ki Hima ki dei ban don ia ki khlieh nongsynshar ba pura, hynrei ia ki to kiba don hapoh ka mukotduma kim hap ban ap ia ka rai jong ka iing bishar.La ai nuksa kum ka Hima Mylliem bad ka Shella Confederacy.

La ong ruh ba ka KHADC ka la shim ia ka rai ba kin ai jingiarap ia ka Khasi Author Society (KAS) ban kin pynmih ia kawei ka Dikshonary ban pynriew spah ia ka ktien khasi. Ka EC kan wad ki lat ki lynti na ka bynta ka jingbha jong ka Council.

Ha ka jingkren jong u bah Gigur Myrthong Deputy CEM ba dei peit ia ka pla pisa jong ka Council haba kren halor ka jingtai ia ka mang tyngka u la ong ba u ai khublei ia baroh ki dkhot jong ka iing dorbar kiba la ia shim bynta ha kane ka jingiakren na ki 15 ngut kiba la ai kyrteng hynrei kiba la ia shim bynta ki long 11 ngut.

Haba ia dei bad ka tnad Pule puthi, la ong ba mynta kam shym don ka jingmang tyngka, hynrei ka Council kan wat ki lad ki lynti kumno ban iarap ia ki skul, namar ka long kaba don kam ban iarap ia ki, haba ia dei bad ka Professional Tax la ong ba ka ophis kan sa leh online ban pynsuk ia ki briew.