Shen yn pynlong ia ka audition jong ka Meghalaya Got Talent 4

Shillong:Ka Meghalaya’s Talent Search Organisation mynta ka sngi ka la pynbna paidbah ba shen kin sdang ia ban pynlong ia ka Audition jong ka “Meghalaya’s Got Talent Season 4”.

Ha ba ia kren bad ki nong pathai khubor, ki la iathuh ba ia kane ka audition kin sdang naduh ka 6 tarik u Nailar 2019 ha man la ki shnong jong ka ri lum Khasi Jaintia bad Rilum Garo ruh kumjuh.

Ka Meghalaya Talent Search Organisation ka dei na ka seng kaba la ai lad ia ki riew don sap naduh ki khynnah rit ki samla haduh ki ba la san ka rta ki kynthei bad shynrang ki ba don ka sap ki phong ba ki lah ban pyni ia ki sapki phong ki ba ki don.

Na ka liang ki nongpyniaid ka MTSO, ki la iathuh ba lyngba kane ka jingia kop Meghalaya Got Telent kan ym dei eh tang ban pyni ia ki sap ki phong ba ki don, hynrei kan long ruh kum ka lad ban kamai jakpoh. Kum ban shu pynkynmaw ba ki nongjop jong ka Meghalaya Got Talentki la ioh lad ban shim bynta ha ki rynsan ki ba heh. Kum ki prokram jong ka Sorkar Jylla, ki la ioh ruh ia ban shim bynta ka ki ba bun ki program ki ba long shabar ka jylla ruh.Napdeng kine ki don ruh kiba la seng ia la ki jong ki Dancing bad Singing School.

Na ka liang jong ka MTSO ka khot kawer ia ki baroh ki riew don sap ban shim bynta ha ki audition ba ka MTSO kala pynbeit ha ki shnong jong phi.Na ka liang ka MTSO ka buh ruh ia ka jingkyrpad ia ka Sorkar Jylla, ki company bad ki riewshimet ban iarap lang ha kino kino ki bynta khnang ba kane ka show kan iaid beit iaid ryntieh ba kan poi sha ka thong.