Shen yn pynïasoh NPP, u MLA ka West Shillong konstitwensi

Shillong:U MLA ka Congress ba shah sospon ba mihkhmat ïa ka West Shillong u Bah Mohendro Rapsang, hynnin ka sngi Palei ula pynthikna ba un sa pynïasoh noh sha ka National Peo ple’s Party (NPP) ha kine ki khyndiat taïew ban wan.

“Ïa mynta hi nga dang dei u MLA ka Congress hynrei ngan ym mih ïakhun shuh na ka Congress namar ba nga don hapdeng ka jingshah sospon bad ha kine ki 10 snem ban wan, ngan sa iehnohkam na ka Party bad kum u MLA ruh ban leit pynïasoh noh sha ka party thymmai bad nga thikna ba ngan ïasoh bad ka NPP,” ong u Bah Rapsang.

Halor ka jingiehnohkam na ka Congress, une u MLA ula pynpaw ba u sngewsih halor ka rukom leh jong ka party ïa u bad ïa ki saw ngut kiwei pat ki MLA ba shah sospon.
“Ka roi ka par jong ki Nongshong shnong bad ki Shnong ki thaw kan dei ki artylli ki mat ba hakhmat eh jong u ban mih ïakhun ha kane ka elekshon MLA 2023,” ula ong.

Haba ïaroh ïa ka Sorkar MDA ba ïalam da ka NPP, u Bah Rapsang ula ong ba hapoh ka jingïalam jong u Myntri Rangbah u Conrad K Sangma, shibun ki prokram jong ki samla la pyntreikam ha kane ka samoi bad la khmih lynti ba kin dang don bun ha ki snem ban sa wan.

“Kane ka Sorkar ka la wanrah ïa shibun ki prokram na ka bynta ki nongshong shnong, kiba duk, ki nongrep, ki nongïalehkai, ki samla bad kiwei bad ngi don ka jingkyrmen kaba skhem ha u Conrad K Sangma uba dang samla rangbah bad ba tbit,” ula ong.
Une u MLA ula pynpaw da kaba ong, “Ha kane ka elekshon ban wan, kiba bun ki MLA ka NPP kin sa jop biang bad ngi sa ïohi ïa ka jingkylla ha Meghalaya”.