Shen yn pynbna ia khih ha EJH

Shillong,6 Iaiong:
Ki 5 seng ba kyn thup ia ka AJYWO Seng kmie, KSU-JHDU, SRS-EJH, HNYF-EJZ bad ka FKJGP Khliehriat Circle, ha ka 5 tarik mynta u bnai ki pynlong ia ka jingialang paidbah ha kompon jong ka Khliehriat West community Hall, bad ha katei ka jingialang la wan ban ia shim bynta da ki Rangbah Shnong, ki Sengbhalang bapher bapher bad da ki spah ngut ki paidbah ban ia kren halor ka jingsniew palat ka surok NH 44. Katei ka jingialang da kawei ka sur ka la shim ia ka rai ban shim da ki lynti jingiakhih kiba tyngeh ban pynbor ia ka sorkar ban maramot noh ia ka surok NH 44, bad ryngkat ka jingkyrshan ki sengbhalang bad ki Rangbah shnong bapher bapher, ki 5 seng ki la pynbna ba shen kin pynlong da ki jingiakhih ba tyngeh ha EJHD.
La pyniaid ia ka jingialang da u Bah SS

Niangti, General secretary jong ka KSU-JHDU. Ha kane ka jingialang nalor ki jingkren ba la ai da ki nongialam jong kitei ki 5 seng, la ioh jingkren ruh na kiwei pat ki sengbhalang, ki Rangbah Shnong bad ki paidbah. Nalor u President ka AJYWO u bah M H Dkhar la ioh ruh ki jingkren na u Ma C Rymbai President, u Ma Langmon Bareh Vice President bad ruh u Ma Earling Shadap Organising Secretary ka, ki la ther tyngeh ia ka sorkar da ka ba ong ba ki la dep dep ban kyrpad ia ka sorkar da kaba jai jai ban maramot noh ia ka NH 44 naduh kine ki por ba la dep hynrei haduh mynta ka sorkar kam shym la sngap ei ei ruh em bad ki la ong ruh ba mynta ka la dei ka por ban pynlong noh da ka jingiakhih kaba tyngeh haba roh kawei ka East Jaintia.
Ki wei pat ki ba la ai jingkren bad pynpaw tang kawei ka sur ki long u Bah Tuesday Lytep President FKJGP-JHDU, u Bah D. DKhar General Secretary ka HANM Sengkmie, u bah Suchiang Asst. General Secretary ka HNYF-EJZ, u bah Marshall Biam President ka HNPF-EJH, u Bah Leo Siangshai ki ba la ong ba ka long kaba phylla ba kumno ka sorkar ka ieh bein ia ka NH 44, haba kane ka surok ka dei ka u budlum jong ka jylla Meghalaya bad ruh u thied snam jong ki paidbah ym tang jong ki nong Meghalaya hynrei wat ki weit pat ki jylla Northeast India kum ka Assam, Manipur, Tripura, Mizoram bad kiwei kiwei de. Kine ki nongkren ruh ki la pyrta shla da ka sur ka ba bitar ba mynta ka la dei ka por ban iakhih da kaba tyngeh.