Shen yn plie noh ia ki kolej, ba ki don 50% kiba la dep ai tika

Shillong:Ka jingkhang ia ki skul bad ki kolej ha ka jylla la kumba shisnem tam naduh ba la wan ban lynshop ka khlam Covid-19 ka la pynlong ia ki khynnah ba kin duh ia ki jingbatai ha ki klas bad kumjuh ka la pynlong ruh ia ki kmie ki kpa ba kin khuslai na ka bynta ka lawei ki khun jong ki.

Ha kaba iadei bad kane, na ka liang u Myntri ka tnad pule puthi ka jylla, u Bah Lahkmen Rymbui u la pyntip ba tad haduh ka 3 tarik u bnai Nailar 2021, la ioh jingtip ba ki la don haduh 50% ki khynnah pule ka jylla kiba la dep ban ai ia ka tika ban iada ialade na ka khlam Covid-19.

Dang shen, ka tnad pule puthi ka jylla ka la pan jingtip na baroh ki jaka pule ne ki kolej kiba don hapoh ka jylla ia ka jingdon jong ki khynnah pule kiba la palat ka 18 snem ka rta kiba la dep ban ai ia ka tika Covid-19.

Haba kren sha ki lad pathai khubor ha ka 3 tarik u bnai Nailar 2021, u Bah Lahkmen Rymbui, u la ong ba ka jingdon jong ki khynnah pule kiba la kot ia ka 18 snem shaneng kiba la dep ban ai ia ka tika kaba la kot haduh 50% ka la mynsiem shikatdei eh namar kane ka long kum kawei na ki lad ban tip bad ban khmih ba lano yn lah ban plie biang noh ia ki kolej ha ka jylla. U Bah Lahkmen Rymbui u la ong ba ka tnad ka la pynkhreh ba lano yn plie noh ia ki jaka pule hadien ba la rai ban pynbna noh ia ka result Secondary School Leaving Certificate(SSLC) bad ka Higher Secondary School Leaving Certificate (HSSLC) jong ka Arts Stream ha ka 5 tarik u Nailar 2021 bad u la ong ruh ba ka la dei ka por ban sdang plie noh ia ki jaka pule ha ka jylla kumba long lem ha kiwei ki jylla jong ka Ri India. Shuh shuh u Bah Lahkmen u la ong ba ka jingkiew jong ki briew kiba iabit ia ka khlam Covid-19 ha ka jylla ka la long kaba shyrkhei bha ha kine ki sngi bad dei na kane ka daw kaba la pynlong ia ka tnad pule puthi ba kan sangeh shwa ban plie ia ki jaka pule ha ka jylla bad u la ong pat ba lada kumno kumno ka jingpang ka kham hiar ha ka jylla, ka tnad ruh kan sa bthah noh ha kano kano ka rukom ban phah plie noh ia ki skul bad ki kolej.

U Bah Lahkmen u la ong ruh ba ia ka resolt SSLC bad HSSLC(Arts Stream) yn sa pynbna ha ka 5 tarik u bnai Nailar bad na ka liang ka Sorkar ka la bthah ruh ia baroh ki jaka pule ha ka jylla ba ki dei ban bud thik pa thik ia ki kyndon ba la bthah da ka Sorkar bad ba kan nym don kano kano ka jingialum ha ki jaka thep klas bad ha kajuh ka por ba kan nym don kano kano ka jingduh klas jong ki khynnah bad u la ong ruh ba ki jaka pule kim dei satia ban phah siew mardor ia ka bai klas jong ki khynnah namar ka long kaba eh ia ki kmie ki kpa jong ki khynnah ban siew mardor ia ka bai klas ha kum kine ki por ba kiba bun ki longing longsem ki la shah ktah ha kane ka khlam.