Shillong: Ka Pay For Right Shillong kala pynbna ba kan sa plie noh shen ia ka PFR Athletic Coaching Camp kaba kynthup iaka track event bad field event na ka bynta ki khynnah Shynrang bad Kynthei jong kane ka jylla kiba la kynjoh naduh 4 snem ka rta haduh 17 snem ka rta. Ia kane ka Coaching Camp yn pynlong ha Shillong tang haka sngi shuti skul bad sngi saitjain khnang ban lait ktah pat iaka jing pule jong ki khynnah.
Katkum ka kyrwoh na u President jong ka Club, u la ong ba ka jingthmu jong kane ka Coaching Camp kalong ban kyntiew bad ban pynjanai iaka sap ka phong jong ki khynnah kane jylla kiba don ha kane ka sap ialehkai. U la ong ruh kumba ngi iohi ba ki khynnah ki juh pynkhreh ialade tang ha shwa ban long ka School Sports lane ka District level, kumta ngi shim ia kane ka sienjam ban ai ka jing hikai iaki khynnah ha baroh shi snem ba kin long kiba la pynkhreh lupa lada don kino kino ki kompetition bad ka thong jong ngi kalong ruh kumno ban wanrah bad ban sei iaki khynnah sha ka madan ialehkai khnang ban pyllait iaki na ki kam kiba sniew bad naka bynta ka jingkoit jing khiah.
Ka Club ka kyrmen ruh ba lyngba kane ka Coaching Camp kan iarap iaki khynnah ba kin lah ban pynkhreh bha ialade lada don kum ka Inter School Athletic lane District Level bad kiwei kiwei ki kompetition.Kane ka Coaching ka don ruh ka thmu ban wanrah ka jing myntoi naka bynta ka jylla kaba dang pynkhreh mynta ban pynlong iaka National Games.
Kino ki khynnah shynrang lane kynthei kiba kwah ban don bynta ha kane ka Coaching Camp iaka jingtip kaba bniah phi lah ban phone ha kine ki number 87941-47412 bad 9862215258.
Phi don ban ong eiei?