B.M.Lanong
Haba nga ong ‘shen’, ngam mut shibnai-arbnai bad ngam mut pat ruh da ki snem, hynrei kan ym slem shuh ia ngi, ban ngin ioh shispah-na ka-shispah ia ka bhah kam Sorkar ha Meghalaya, namar ki Garo ki la dawa ban phiah noh la kajong ka jylla, hadien ba ki sengbhalang na Garo Hills, ki la sdang dawa ia kane bad ym shym don mano-mano ba pyrshah, wat ka Sorkar u Conrad Sangma ruh ka sngap jar-jar, kumba ong ki Phareng, ‘Silence means Consent’ (haba sngap jar ia ka mat iakren, ka mut ba don ka jingmynjur).
Ki samla KSU ruh la bun-bun snem ki la dawa ban pynbeit ia kane ka mat ‘job-reservation’, naduh ba dang don u Chief Minister banyngkong ka jylla, u Capt. Williamson A. Sangma. 50 tylli ki snem ki la iaid bad la biang hi ka jingmyntoi ba la ioh ki samla na Garo Hills.
La iathuh ia ngi ha kitei ki snem da ki rangbah jong kitei ki por, kynthup ia i Bah B.B. Lyngdoh, P.R. Kyndiah bad kiwei de, ba u Capt. Sangma, ha ka jingshisha, ula don jingsngew ia ka jingdawa ki samla KSU, ula sdang pynwandur ruh ia ki nongrim, kiba pyrshang pynkhih ia kane ka mat (draft), hynrei kitei hi ki Rangbah ki iathuh, ba ula kren pat ha ki ba ‘ia mynta, ieh ngin nang buh teng shuwa’ (keep in abeyance) ka la shu kut noh hangta.
Mynta ba la ai lyer thymmai da ka Seng VPP i Bah Ardent Basaiawmoit MLA, ha kaba la ieng syndon da ka prokram ‘shah thngan’ (hunger strike), khlem artatien kan nang pynsted shuh-shuh ia kaei kaba la iakhih teng bad ba la nang iai pyrkhat da ki bor Sorkar ruh.
Ka jingbym pynpaw ei-ei na ka liang ki Heh ka Sorkar NPP, ka sakhi ba u Chief Minister, Conrad Sangma, un ym nud ban iaid pyrshah ia ka jingdawa ia ka State Garo Hills, khamtam haba ka sur ka la mih na Garo Hills hi.
Imat ha u 2028 te kan mih ka jylla thymmai na ka bynta ka Garo Hills, namar ha baroh kawei ka Garo Hills, don 24 ngut ki MLA, kaba la biang na ka bynta jong ki ban ioh jylla, khamtam ynda pynbun sa ia ki Constituency.
Ki paid Garo kiba bun kiba don la slem ha thain West Khasi Hills bad Ri-Bhoi, ym tip naei ki wan, kin dang don hi ha ka jylla Khasi Hills, tangba ia ka bhah bate kam te la sngewthuh lypa, ba kan ym long shuh kumjuh.
Ka biang palat kata lada ki paralok Garo kin ioh noh la ka jylla namar dei maki hi ki ba pyrshah ban pynbha ia kane ka RP.