Shen lah ban bujli tnad u Dr Mukul, ia ki myntri sorkar

Shillong, 02 Risaw:
U Myntri Rangbah ka jylla u Dr Mukul Sangma u lah ban bate tnad biang ia ki myntri sorkar jongu shen ha kine ki sngi ban wan. Katkum ka thymmei khubor, la iathuh ba u Myntri Rangbah mynta u dang bunkam ka jingiakren bad ki heh ka AICC ban ioh ia ka jingmynjur na ki shwa ba un leh ia kane ka jingbate kam thymmai ia ki myntri sorkar.
Katkum ka khubor ba la iohlum, la iathuh ba ki don na kine ki myntri ba mynta kiban duh ia ki tnad dohkshong bad ki don kiba iajan bad u kin ioh shuh shuh ia ki tnad dohmet.
Ka thymmei khubor ka la ong ba ka Kong Roshan Warjri ka lah ban shah sloit noh ia ka tnad kam pohing bad ka lah ban leit noh sha u Bah AL Hek uba long mynta u myntri ka tnad ka koit ka khiah bad u Bah HDR Lyngdoh u lah ban ioh ia ka tnad ba kham don dohmet hadien ba u la leh tip sngi ha kine ki sngi ban nym pyrshah shuh ia u Myntri Rangbah.
Nalor kine, ka Kong Ampareen Lyngdoh ruh ka lah ban ioh biang sa kiwei ki tnad.
Kiwei kiba lah ban shah ktah ha kane ka jingbate kam thymmai u Myntri Rangbah kin long u Myntri tnad khlaw uba leh shalak bha u Bah Prestone Tynsong, bad ka myntri tnad Social Welfare ka Deborah Marak.
Ka jingbate kam thymmai ka lah ban urlong shen bad kam da slem shuh ha kine ki sngi namar ba u Myntri Rangbah u la kwah ban bujli noh ia ki tnad ba ki myntri ki bat hadien ba la iohi ia ka rukom treikam jongki ha kine ki ar snem ba la dep.
Ki synran jong u myntri rangbah ha kane ka sorkar Meghalaya United Alliance (MUA)-II, ki kynthup Dr Roytre C Laloo, Bah Rowel Lyngdoh, Bah HDR Lyngdoh, Bah Prestone Tynsong,  ka Deborah C Marak, Bah AL Hek,  u Clement Marak, Kong Ampareen Lyngdoh, Bah Sniawbhalang Dhar, Roshan Warjri.