Shillong: Ka sorkar Jylla lyngba ka Bio-Resource Development Centre (BRDC) ka la don ka jingpyrkhat ban buh noh da ka klinik (clinic) sumar da ki dawai kynbat ia ki briew ha ka 7Mer, Shillong, khnang ban kyntiew ia ka jingstad sumar kynbat ha ka jylla.
Ka BRDC lyngba ka sorkar Jylla mynta ka la iatreilang ruh bad ka Quality Council of India (QCI) kaba iatreilang bad ka North East Christian University (NECU) na Nagaland kaba la ithuh da ka sorkar India ban ai syrnot ia ki nongsumar kynbat.
Myn hynnin ka sngi, ruh ka QCI lem bad ka BRDC bad ka NECU ki la pynlong ia ka jingai jinghikai ia ki nongsumar kynbat ha ka nongbah ia ki kyndon ban ioh syrnot. Kane ka mut ba ki nongsumar kynbat kin nym shah khot shuh kum ki doktor jakoid hynrei kin dei ki nongsumar ba la ithuh da ka sorkar lyngba ka ain bad ki lah ruh ban buh jaka sumar ha kano kano ka jaka.
Haba kren halor kane, u Bah T Iangjuh, u Junior Scientist ka BRDC, u la iathuh ba ka BRDC ka la don ka jingthmu ban buh iaka klinik ha Upper Shillong ha kaba ki nongsumar dawai kynbat kin wan ban don man ka sngi ban sumar ia ki briew.
“Ngi (BRDC) la don ka jingthmu ban buh ia ka klinik ha thain Upper Shillong ha kaba ngin khot ia ki nongsumar kin wan ban ai jingsumar ia ki briew da kaba buh sngi kylliang uwei hadien uwei bad yn ai jingiarap jingsiew na ka tnad BRDC ia ki”, la ong u bah T Iangjuh.
U bah Iangjuh u la iathuh ba ki don kumba 2 hajar ngut eiei ki nongsumar dawai kynbat ha ka Jylla, hynrei kiba la dep rejister ki don tang kumba 585 spah ngut ban sam tiar.
Ula iathuh ba ka jingthmu ba kongsan jong kane ka jingai jinghikai kaba ar sngi, ka long ban iarap kumno kin ioh ia ka synot khnang ban kin long kiba la ithuh da ka sorkar.
“Haduh mynta, ki don kiba shu sumar kumto khlem kano kano ka jingithuh naka sorkar hynrei lyngba ka syrnot ba kin ioh, kan iarap ia ki ban long ain ba ki lah ban sumar ha kano kano ka jaka”, la ong u bah Iangjuh.
La iathuh ba ka BRDC ka la iadon bynta bad ki nongsumar la shiphew snem, ban wad ia ki jingeh jongki bad ki rukom sumar ba ki donkam kum ki tiar. Lashai ka sngi, ki don kumba 585 ngut ki nongsumar kynbat kiban sa ioh pdiang ia ki tiar kum ki kor tylliat, ki rynsan thad sngi ia ki kynbat bad ka pisa malu mala ba la iarap na ka tnad Tribal Affairs.
Ha kawei ka liang, la iathuh ba kawei ka jingeh jong ki nongsumar kynbat ka dei ka jingduna ban ioh ia ki kynbat na khlaw namar ka jingjot ia ki khlaw bad ka donkam ia ka sorkar ban leh eiei halor kane.
Ha kane ka jingai jinghikai la wan ai da ka Prof Debjani Roy, u G Hariramamurthy.