Ki paidbah Nongshong Shnong jongka thaiñ South West Khasi Hills District kylleng sawdong jongki Shnong bapher bapher hapoh ka District ki la pynbeit da ka jingialang paidbah hapoh ka Shnong Mawkyrwat ha ka 31 tarik mynta u Bnai Nailar (August), khamtam ha kaba iadei bad ki Longïing Longsem kiba duk ba kyrduh kiba la wan ban mih shakmat bad ban pynsngew halor ki jingeh kiba bun kumba ki la iakynduh manla ki por tang namar ka jingbym kwah jongki ban pyndonkam ia u AADHAAR hapdeng ka jingim shimet ka jongki. Manla iwei pa iwei kum ki Nongshong Shnong kiba long ruh ki trai shnong napoh katei ka thaiñ ynda hadien ba ki la poi hapdeng ka jingialang ki la pynpaw naduh ki Longkmie Longkpa kumjuh ruh haduh ki Riew Tymmen Riewsan ban pynsngew halor ka jingshah ban beiñ ka jongki kum ki Trai Ri kiba la pynpaw ba kimlah shuh ban ioh pdiang iaki jingiarap lyngba ka Sorkar jylla kiba long ki jingdonkam jongki ba manla ka sngi kynthup naduh U Khaw Rashon, Ka bainong sngi lyngba ka jingtrei bylla 100 (Shispah) Sngi jongka MGNREGS, Ka jingshah lum pisa hapoh ki Hospital Sorkar, ka jingshah beh kam ba la ai lyngba ka sorkar kum kiba trei Nurse bad kumjuh kiba trei hapoh ICDS, ka jingshah pynduh kiba duk kiba dei ban ioh ia ka skhim longïing shimet, ka jingduh noh ia ka Pisa kynshew shimet kaba ki la thep hapoh ki Bank bapher bapher bad kumjuh kaba la ktah ia ki Khynnah Skul kiba la shah beh napoh skul bad ban duh noh shisyndon iaka pule puthi tang namar ka jingbymdon ia u AADHAAR.
Ha katei ka sngi nakaliang jongki paidbah napoh katei ka district jongka Jylla Meghalaya ki la khot la iawer ia ki Nongialam jongka kynhun MEGHALAYA AWAKEN CONCERN CITIZENS (MACC) kaba la iaid da jingieng rangbah lyngba ka Awaken India Movement (AIM) ban don ryngkatlang hapoh katei ka jingialang ha kaba ki paidbah ki donkam ban pynsngew iaka jingshem jingeh kumba ki la iakynduh ha kine ki sngi ba mynta.
Nakaliang jongki Nongialam ba halor ka High Elevated Council (HEC), Central Body jongka kynhun MEGHALAYA AWAKEN CONCERN CITIZENS (MACC) ki la leit ban synran da jingai mynsiem iaki paidbah shapoh katei ka thaiñ bad kumjuh ka kynhun kaba long ka Seng Kmie hadien ba la sakhi ia kitei ki jingjia baroh ka la shim ruh iaka rai da kaba thaw noh shisyndon iaka MEGHALAYA AWAKEN CONCERN CITIZENS (MACC) District Level da kaba la pynkhamti halor ki Trai Shnong napoh katei ka district kiba long ki Para Ri napoh katei ka thaiñ kiba la shimti kum ki Nongialam ka MEGHALAYA AWAKEN CONCERN CITIZENS (MACC) South West Khasi Hills District ban mih shakhmat da jingsynran paidbah khamtam ha kaba iadei bad kiba bun ki jingeh kumba ki paidbah ki shem bad iakynduh na ka por sha ka por da kaba mih shakhmat bad shimkhia bad ieng rangbah da jingiatreilang khlem da kynran dien kum ki briew kiba sngewthuh bad shemphang ha la kajong ka Jylla. Ki nongkitkam hapoh katei ka District la jied ia ki Trai Ri napoh Mawkyrwat, Mawkohphet, Rangthong, Mawten, Mawpon, Manad lem bad kiwei kiwei ki Shnong kiba dei napoh South West Khasi Hills District (SWKHD).
Da jingiatylli kum ki briew napoh la kajong ka Jylla ha kaban treimon sngewbha ki la shim ruh iaka rai ban iaid paidbah da ka Movement kaba la don lypa hapoh ka Jylla Meghalaya kumjuh ha kylleng sawdong jongka Ri India kaba la tip kum ka Awaken India movement (AIM) ha kaban ieng iada halor katei ka mat kaba ki paidbah nongshong shnong ki iakynduh da jingeh bad shah niew beiñ ha la ki jong ki Trai Ri kiba long ki Nongtreikam Sorkar.
Halor kine ki jingjia bun na ki Nongtreikam Shnong kam Hima Sima bad kumjuh ruh haduh ki MLA, MDC ki la hap ban shu peitkai manla kapor napoh ka Jylla lajong ki bym kheiñ dor ia ki paidbah haduh ba la ktah jur ia kiba bun balang khamtam ha kaba kum ki paidbah ki pyrshang ban ieng iada katkum ka hok ia la kajong ka jingim da jinglaitluid lyngba ka jingbym kwah jongki ban pyndonkam ia u AADHAAR.
U Bah Banshai Marbaniang uba long u President jongka kynhun MEGHALAYA AWAKEN CONCERN CITIZENS (MACC) Central Body bad kumjuh uba bat ruh iaka kyrdan kum u Chairman jongka Awaken India Movement (AIM) Meghalaya State la hap ban shim iaka rai ha ryngkatlang bad ki para dkhot lem bad ki paidbah ha kaba iadei ban mih shakhmat bad ban pynglong noh iaka jingialang paidbah hapoh Nongbah Shillong da jingiawer ia ki paidbah kylleng sawdong ka Jylla kiban mih shakhmat ha kaban ieng ban iada ia la kajong ka jingim halor ka jinglaitluid katkum ka hok bad jingshisha kumba kadei banlong. Ka Awaken India Movement (AIM) kaba long ka movement jongki paidbah ka Jylla lyngba u Chairman yn sa pyntip paidbah ha kano ka sngi kaba biang ban pynlong iaka jingialang hapoh Shillong bad ka ban long ka sngi kaba kum ki paidbah kidei ban pynpaw da jinglaitluid na bynta ka lawei jongka Ri bad ka jaidbynriew ha kaba iadei kumno ban ieng rasong katkum ka Riti Synshar paidbah jongka Ri India junom la junom.
Ki paidbah jongka Jylla Meghalaya kidei ban shimkhia iaka rai kylleng sawdong ka Jylla da jingieng rangbah kum ki Trai Ri ban ieng pyrshah ia kitei baroh kiba la dusmon ia ki paidbah haduh ki Khyllung Khynnah bad kiwei kiwei da kaba kdew shai ba ki la pynkheiñ iaki kyndon jongka Riti Synshar Paidbah ka Ri India (Constitution of india) lada phai ha kaba iadei bad ka bynta jongka Fundamental Rights naduh ka artikil ba 12 haduh 35 kumjuh ruh ban khlem da kheiñdor shuh haduh ki rai kiba la shim lyngba ka Supreme Court badon burom jongka Ri India ha kaba iadei bad u AADHAAR khamtam ha kaba iadei bad ka rai kyrpang na bynta ki Jylla kylleng sawdong kiba don hapoh Northeast India.
Bun na ki briew kiba im hala kajong ka um syep katkum ki jingdonkam ba manla ka sngi hala kajong ka Jylla ki sah hapdeng ka umdum ynda haba sakhi shai halor ka jingshah beh kam ki nongtreikam sorkar ne wat ban duh kam bad lem da jingshah beh Skul ki khyllung khynnah naduh ki Skul sorkar bad skul private bad ban duh ia kiwei kiwei ki bynta kiba shongdor kum ki jingiarap na bynta ka jingdonkam halor ka hok bad jingshisha ha la kajong ka jingim tang namar ka jingbym don ia u AADHAAR.
Haba tip shai ia kine ki jingjia baroh napdeng ki paidbah ki khlem da ialeh pyrshah ia ki aiñ da kaba ki iaid pynshongdor katkum ka hok bad jingshisha halor ka jinglaitluid kumba la pynkhamti bad kdewshai naduh kaba sdang lyngba ka Riti Synshar paidbah ka Ri India.
Khublei Shibun,
Bah Churchill Syiemlieh,
Genl. Secretary,
MACC (HEC) Central Body.
U Blei u lah ong wat nym kynshew ia ki pisa lah da dei ha ki bank lane ha ing namar ki khniang bad ki sarang kin bam duh.