Shem jingeh ka KHADC ba khanglad ki pulit Assam Ban rejistar khyndew ha ki thain Langpih

Shillong, 5 K’lyngkot:
Ka KHADC ka shem jingeh ban rejistar ia ki khyndew ha ka thain Langpih jong ka West Khasi Hills na ka daw ba byrngem ki pulit Assam la ong u EM ba peit ia ka khyndew ka shyiap u Bah Jansing Tynsong.
“Ngi shem jingeh ban rejistar ia ki kyndew sha kitei ki thain Langpih namar ba byrngem ki pulit Assam”, la ong u Bah Jansing Tynsong ha ka sngi Palei haba iakren bad u Rupang.
U Bah Jansing ruh u la ong ba ka jingthmu jong ka KHADC ban rejistar ia ki jaka ha katei ka thain ka la pulom lut namar bun na ki trai jaka hapoh katei ka thain kim treh ban rejistar namar ki tieng ia ka jingbyrngem jong ki pulit Assam.
U la iathuh ba ki trai jaka trai khyndew kiba hap hapoh ka thain West Khasi Hills baroh ki don kumba 60 iing eiei hynrei bun na ki kim treh ban rejistar ia ki jaka lait noh tang katto katne ki iing ki bym shym la shah pyndik ne shah byrngem ha ki pulit Assam ki treh ban rejistar.
Ka Fact Finding Committee ba la khlieh da u Bah KP Pangngiang uba dei u MDC jong katei ka thain Langpih ba la thung da ka KHADC ban leit lum ia ki kot ki sla jong ki trai jaka ha katei ka thain kum shi bynta ban pynkhlain ia ka jingkam jong ka Meghalaya ia katei ka thain kaba la kajia bad ka Assam.
Kakum ka jingiathuh jong u Bah Tynsong la ong ba ia ki kot ki sla jong ki trai jaka ba la lum da katei ka Committee la aiti ha ka KHADC bad hadien la aiti pat sa sha ka sorkar jylla ba kan leh ia kaba donkam namar ba ka KHADC kam pat don ia ka Land Bill.