Shem jingeh ban ïoh ILP, ba synshar ki IAS ophisar bar jylla, ong U MLA

Shillong:Ka jingïai ud jong kiba bun kiba trei ha ki kam imlang sahlang haba ki ïa tyngkhuh kam bad ki ophisar IAS bym dei ki trai jylla ka la pynlong ïa ki MLA ban wanrah hapoh Dorbar Thawaiñ Mang tyngka ka sorkar jylla ha ka sngi Nyngkong.

Halor katei na ka liang u MLA ka Gambegre, West Garo Hills District u Saleng Sangma, u la pynpaw ka jingsngewsih ba wat la ka jylla ka la rakhe dap 50 snem ym shym don satia ki jaka ai jinghikai kiba bha na ka bynta ki kyrtong kiba kwah ban ïakhun ïa ka kam IAS.
Haba pynpaw ba kawei na ki jingeh ban ïoh pyntreikam ïa ka inner line permit (ILP) ka long ba bun na ki IAS ophisar bar jylla kiba synshar ïa ka jylla.

“Ngi dawa ILP hynrei kan long kaba eh, naba bun dei ki IAS ophisar kiba trei hapoh jylla dei kiba namar jylla kumta kan shem jingeh ba kin sngewthuh bad shem ïa ki riti dustur lariti jong ka jylla jong ngi,” ong u Saleng da kaba bynrap ba kumba long mynta tang uwei u ophisar IAS uba napoh ka thaiñ Garo Hills District.
Haba jubab ïa katei, na ka liang u Myntri Rangbah ka jylla u Conrad Sangma u la ïathuh ba ïa mynta ka don ka jaka hikai ka ALC naduh u 2020 bad kaba yn dang bteng bad ka MATTI kiba pynlong eksam civil service bad kaba don ruh ka jaka hikai.