Editor ba don burom,
Hooid, ha kine ki sngi ba la leit noh, nga la ioh pule ha ki Kotkhubor bad la iohi ruh ha ki Khubor digital shaphang ka jingkynthoh jong u Bah Alexander Hek, MLA ka Pynthorumkhrah, pyrshah ia ka jingkem ktien jong u Bah Sanbor Shullai, MLA bad Minister, ia ka jingkren (jingpynpaw) jong u Bah Metbah Lyngdoh, Speaker, hakhmat ka candidate Draupadi Murmu kaba ieng ialeh na ka liang synshar NDA na ka bynta ilekshon President jong ka Ri India. Ha ka jingshisha, u Bah Hek um da donkam ban pynpaw paidbah ia jingkren ba la kren u Bah Metbah ia ka candidate President bad ba la kem ktien da u Bah Sanbor. Namar kane ka la jia ha ka jingiakynduh tang jong ki MLA jong ka MDA, kata ruh ym baroh, bad ka Murmu bad lai saw ngut ki nongsynran jong ka. Lada long ban pynpaw paidbah ruh ka long ba ka Murmu ka la wan iuhkjat hangthie ha Umiam Orchid Lake ban pan jingkyrshan na ki MLA jong ka Meghalaya ban poi sha ka thong jong kane ka ilekshon ka ban long ha ka 18/7/22. Wat ia kaei ka jingmih na kane ruh ym pat , ban iathuh paid namar wat ia ka rai jong ka MDA ruh ym bat shim namar ym pat long jingialang na ka liang jong ka. Dei tang ha ka 12.7.22 ba ka MDA ka la iakynduh lang ban shim ia ka rai jong ka.
Nalorkata, ka jingsngew jong nga ka long ba ban buh hakhmat ka Murmu ia ka mat (issue) ka jingshah lehbein ki khristan ha India bad ban pynduh ia ka lane weng noh ia ka, kam pat iahap bad kam pat dei por ha kane ka kynti jong ka jingiakynduh ha Umiam namar kam pat long President jong ka Ri India, ka dang long tang ka candidate kaba dang ialeh. Dei tad hadien ka 21/7/22 ynda ka la jop bad la long President bad ynda ka la shong ha ka khet President, kata te ka la dei por bha bad ban leit iakynduh ia ka halor kane ka mat ba la kdew haneng, bad lada ka MDA ka sngewkhia halor kaei ba la buh u Bah Metbah hakhmat ka candidate, bad lada ka MDA ka leit iakynduh markhmat da ka kynhun (delegation) ryngkat bad ka Memorandum halor kane ka mat shah lehbein, nionbein bad shah pynshitom bein ki Khristan ha Ri India. Lehse ha kata ka por ka sa lah ban leh ei ei, bad kata ruh lada ka sorkar Pdeng ka kohnguh ia ka jingiasaid lem jong ka. Lym kumta kan ym poi shano ruh namar mynshuwa, la bunsien palat la buh ia kane ka mat hakhmat ki bor ka sorkar India, wat ha ki por ba dang bat ka sorkar Congress ruh, hynrei kine ki jingjia kim duh satia. To lehse, ha ka por long President kane kaba mynta (lada ka Jop) ka lah ban pynlong kam lada kane ka sorkar MDA ka sngewkhia bad kitkhia halor kane bad lada ka dang lah ban leh ei ei ban pyni ia u Soh bankynsai shuwa ka Ilekshon 2023.
U ba burom ia phi,
U Bah Philip Marwein,
Sr. Journalist,Meghalaya,
Shillong.
Sngewtynnad shisha ia ki kyntien ki ba phi thoh hangne “Dei ban tih bad khlong bha ïa kita kiba sma iwkhong kiba tap ïa ka jingshisha, bad ruh hap ban shah shitom ha kata ka jingsma. Namar lada ym tip ïa ka jingshisha, ym don nongrim haei haei ruh, u Blei u dang iai kyrkhu ia phi.