Shaphang ka jaka bret ñiut, na ka bynta ka Sor Jwai

Da u Shiwa E Siangshai, Kyndongtuber

Ngim lah ban len iaka jingshisha ba ka Sor rit Jowai ka long ka iitkhmih jong ka Ri Lum Jaintia baieit jong ngi, ka long ka Head Quarter jong kane ka Rilum hakaba ki Office Sorkar, ki Iew, ki Skul, ki College, ki Bank, Hospital, Doctor Clinics, khamtam ka District Council JHADC, bad bun kiwei de ki treikam hangne naka bynta jong u paid Pnar naduh mynshwa haduh mynta bad ngi im dakaba shaniah iaki kam ki jam ha Jowai!

Ki nongkyndong bad ki para marjan shnong na kylleng kane ka Ri Lum ki phah shong skul iala ki khun ha Jowai, ki nongtrei office, ki nongkhaïi, ki nongbylla, ki nongshongïew bad kumta ter ter ki wan shongwai, buhai shnong bad wan donkam hakane ka sor rit. Kawei kaba kongsan eh ka long ba ngim lah ban im khlem da bret ia kiei kiei kiba ngim donkam shuh. Nakata ka daw ki sa mih ki ñiut, ki jaboh bad ka jingpynjakhlia iaka mariang. Kane ka khlem jia tang ha ka shnong Jowai hynrei ha baroh ki sor bad ki nongbah haka pyrthei. Bad haba ka long kumne ka sa mih ka jingkylli, hangno yn bret iakine ki jaboh (waste)? Mano ban kitkhlieh bad hangno yn bret iaki?

Bad haka jaka ba ju bret jakhlia ym long shuh! Balei ki para marjan shnong lane ki seng Bhalang ki pyrshah? Baroh ngi tip shai ba ki pyrshah namar maki ruh kim kwah ba ka jakhlia bad ka bih jongka kin wan lynshop iaka thaiñ jong ki. Lane ban shu lum thup iakine ki jakhlia hapoh ka sor Jowai te kan ialam sha ei? Ka jingiakhih ki Waheh Shnong Jowai ka long kaba dei eh!

Halor kane, nga sngewdei ban kyntu ya baroh lang ki Paid Pnar kiba don tang shitroh hakhmat ka Ri India ba ngin ia sngewthuh jingmutlang. Baroh ngi siew iaka khajna sha ka Sorkar, bad ngi don ka hok ban dawa halor kane, nalorkata ka Sorkar (lane ki Sorkar) ka don ka bor katkum ka aiń ban shim iakano kano ka jaka kaba ka sngewbit naka bynta ban pyndonkam naka bynta ka jingmyntoi bad jingbha u paidbah ym naka bynta ka jingpynshitom lane pynjot mariang. Ka Jowai Municipal Board kala pan thied jaka bret niut! Lada don uba die, kumno pat ka NOC nakato ka Shnong! Hato ki Shnong lane ki Pressure Groups kim pyrshah? Ban shu kynnoh iaki nongmihkhmat kala ju long ka dustur jong ngi naduh myn hyndai! To ngin ym sngewphylla.

Nga pynkut iakane ka article tang daka jingkyrpad rit iaka Ri Lum baroh kawei ban poi sha ka jingiapynbeit lang bad kumjuh iaki Nongialam kiba iadei kam ba phin khot daka DORBAR ki nongialam ban pynbeit. Kynmaw iaka por U Woh Kiang Nangbah hakaba ka Ri Lum ba ieit jong ngi ka ieng tylli ka wei!