Shano jah ka hukum ka SC halor ka kam tih dewiong, kylli ka AJCCTA

Jowai: Ka All Jaintia Cement and Clinker Transporters Association ka la dawa ba ka sorkar ka dei ban ai ka jingpynshai paidbah halor ka hukum jong ka Supreme Court na ka bynta ka kam tih bad shallan dewiong ha ka jylla.
“Ngi lyngngoh ba ka sorkar hapoh ka jingialam u Conrad K Sangma kum u Chief Minister badon burom balei la shu pynjah rngai ia ka hukum ka SC halor ka rai ban weng noh jingkhang tih bad shallan dewiong ka NGT ha ka jylla naduh u snem 2014”, la kynthoh u President ka AJCCTA, ma Balen Thubru.
Ka AJCCTA ka la ong ba la palat 7 bnai mynta ba ka SC ka la shah biang ia ki paidbah ka jylla ban tih bad shallan dewiong da kaba bud ruh ia ki kyndon iada mariang katkum ka MMDR Act, hynrei haduh mynta ki paidbah kim pat ioh lad satia ban tih ne shallan ia u dewiong bad kane ka la pynlyngngoh ym tang ia ka seng hynrei wat ia uba bun balang.
“Balei kane ka sorkar kam kwah satia ban pyntreikam ia katei ka hukum ka Supreme Court?”, la buh jingkylli ka AJCCTA ia ka sorkar jylla.
Kum ban shu pynkynmaw hangne ka NGT ka la khang tih bad shallan naduh u snem 2014 bad ka Supreme court ka la pynmih ia ka hukum ha ka 3 tarik July,2019 ban ailad biang ia ki paidbah ban tih ia u dewiong da kabud ryntih ia ki kyndon iada mariang.
Balei kane ka sorkar ka kwah ban pynlong kam be-ain lane kam kaba Ar – Nombor bad ka iohnong aiu halor ka kam khaii tuh ia u dewiong? La buh jingkylli u President katei ka seng.
Ka AJCCTA ka la pynpaw ruh ba ka jingailad ia ki nongkhaii ban khaii tuh ia u dewiong ka la buh jingeh shi katdei eh ia ki nongkhaii hi, namar wat lada ki la lait na baroh ki Check Point ki pulit ka Meghalaya hynrei ynda poi sha Assam kat bym pat die ne ioh pisa ha kti, ki kjat jong u nongdie ne nongkhaii tuh ki don kawei ha surok kawei pat ka la don lypa sha thanad ki pulit Assam.
Ka AJCCTA ka la buh jingkylli ruh ia baroh ki 60 ngut MLA ka jylla ba balei ki ia sngap jar halor kane ka hukum ka SC? Bad katno ngut napdeng ki 60 ngut kiba ioh ban kamai sha pla lajong na ka kam khaii tuh ia u dewiong?
Haba phai pat sha u dewiong uba 32 lakh ton hapoh ka jylla ia uba la dep tih bad ai jingkhein u jah rngai shaei mynta, la kylli ka AJCCTA.
Ka AJCCTA ka la kyntu jur ia baroh ki trai par dewiong, Ki nongkhaii dewiong, ki trai trok bad ia ki Sengbhalang ba kin mih shakhmat ban iatreilang bad ka AJCCTA ban ialeh pyrshah halor kane ka kam be-ain jong ka sorkar bad ban pynduh pyndam noh ia ki kam be-ain shi syndon, la pynkut ka khubor na u President ka seng.