Jowai: Ha ka jingialang paidbah myn hynnin ka sngi kaba la pynlong ha Dkhiah West, East Jaintia Hills District da ka Jaintia Coal Miners’ and Dealers’ Association (JCMDA) ha ryngkat ka Meghalaya State Coordination Committee of Coal Owners, Miners, Dealers and Coal Transporters Forum la dawa ba ka sorkar kan plie noh shisien don ia ka jingtih dewiong da kaba pynbiang lut ia ka Mining Plan kumba la pan da ka Supreme Court bad NGT.
U bah Sony Khyriem, u nongai buit ia ka Seng ki Nongkhaii Dewiong ka jylla haba iakren bad ki lad pathai khubor u la ong ba ka sorkar jylla ka la de plum haduh palat 5 klur tyngka na ki malik dewiong ban pynbha ia ka mariang, hynrei Balei ba la buh sah ia kane ka Pisa hapoh Bank khlem da pyntrei kam satia ia ka.
“Ngi dawa ba ka sorkar ka dei ban pyntrei kam ia kane ka skim kaba la tip kum ka Meghalaya Restoration and Protection of Environment”, la ong u bah Sony.
Utei u heh nongialam ki trai par bad nongshallan dewiong, u la ong ruh ba ka sorkar jylla bad ka sorkar India ki la heh tang ka jingiapyni nia mar kylliang ha kaba iadei bad ka jingkhang tih dewiong khlem poi shano shano.
“Ngi dawa ba ka sorkar Jylla kan pynbiang lut ia ki kot ki sla kiba donkam khnang ba ka Supreme Court kan lah ban plie ia ka jingtih dewiong ha ka jingbishar kaban sa long ha ka 15 tarik une u bnai, namar ngi don ka jingkyrmen ba ngin ioh biang ban tih dewiong”, la bynran u bah Sony.
Utei u Nongialam, u la kynthoh jur ruh ia ka sorkar jylla kaba la khein sting shaduh ba palat ha ka jingiadei bad ka jingshallan ia u dewiong na ka jylla katkum ka hukum ka Supreme Court kaba la mih ha ka 4 tarik u Nohprah.
“Ka Supreme Court ka la ai lad ban shallan ia u dewiong uba don ha madan naduh ka 4 tarik, katba ka sorkar jylla ka dang pynmih ia ka Notification ha ka 10 tarik bad bteng pat sa ka shuti Khrismas bad Newyear kaba 10 sngi. Ngim tharai ban ngin lah ban pyllut ia 1.67 metric ton u dewiong hapoh ka 31 tarik une u bnai”, la ong u President ka JCMDA, u ma Balios Swer.
U ma Balios Swer u la ong ruh ba ka dor ka Challan ka long palat ia ka 50 hajar tyngka na ka bynta 9 ton bad ka seng ka la ioh ia ka jingujor na kiba bun halor kane. Nalor katta, ka tnad DMR ruh ka la shu ai Shallan Kulmar khlem da iaid katkum ka lynti hynrei da kaba jied ia ki briew kiba ia iajan lane kiba don jingiadei bad ki Minster bad MLA.
Ka jingialang paidbah mynta ka sngi la wan ban iashim bynta da palat 1000 ngut ki nongkhaii dewiong nalor ki longkmie kiba im bylla sngi na ka kam dewiong.
Ka Synjuk ki Rangbah Shnong, ki Dolloi bad ruh ki MDC nalor u CEM barim ka JHADC, u ma Hambertus Nongtdu bad u MLA barim ka Khliehriat, u ma Justine Dkhar ki la wan ban ai jingkren ha katei ka Public Meeting.
Na ka liang u ma Balios Swer u la pynpaw ruh ba lada Supreme Court ka ai ia ka rai pyrshah ia ka jingdawa jong ka Seng Nongtrei Dewiong, kin khot biang ia kawei pat ka Public Meeting ban shim rai ban leh da kawei pat ka lynti.