Shillong:Ki nongdie bad nongkhaïi dohkha hapoh ka lama ka Khasi Jaintia Fish Wholesaler and Retailer Association (KJFWRA), ka la pynpaw ia ka jingshaiong hadien ba la shah khang ban wanrah dohkha nabar jylla bad ki la dawa na ka Commissioner of Food Safety Kong Rosette M.Kurbah ba kan pynshai mynno bad hangno ba ka Tnad ka phah leh Test ia ki dohkha bad kiba wanrah na kaei ka jaka.
Mynhynnin, ha ka por mynstep, kine ki nongdie dohkha, ki la ialum kyrkieh ha Iewduh, hadien ba ki la shah khang syndet ia ka jingdie bad shalan dohkha na shabar jylla.
Ha ka hukum, ka Commissioner ka Food Safety ka la ong ba na ki 40 tylli ki dohkha bala leh test, haduh 30 tylli ki dei kiba la test positive ba injek ia ka dawai formalin.
“Ngin leh shuh kumno, baroh ki dohkha ba la wanrah, ngi hap shu theh noh”, la ong ki nongdie dohkha.
Tang ha Iewduh ki don kumba 200 tylli ki dukan die dohkha bad da ki spah kilo la die man ka sngi khlem da khein ia kiba shalan shabar ka nongbah bad kiwei ki jaka.
Ka ong ba kane ka long kat kum ka analysis report jong ka Assistant Food Analyst ka Sorkar Jylla kat kum ka Report No. SFTL/FW/2023-24/283-312 ba 6 tarik Jylliew, ba ong baka jing injek Formalin ka dei kaba long bih kaba khlain bor bad ba ktah jur ia ka koit ka khiah.
Ka Commissioner ka la ong ba ka jingkhaii, jingbuh bad jingdie ia ki dohkha bala injek da ka formalin lane kino kino ki dawai ba iada ia ka jingpyut, ka dei ka bym shngain satia ia ka koit ka khiah kat kum ka kyndon 3(1)(zz)(v) jong ka Food Safety and Standard Act, 2006.
Halor kane, ka la khang ban shalan bad die ia ka dokha ba wanrah nabar ka Jylla haduh 15 sngi ha Jylla haba buh kyndon ruh ba kiba ialeh pyrshah kin ngat ha ka jingpynsajia ba 7 snem ha phatok bad ka kuna ba T. 10 lak.
Ka KJFWRA ka dawa ia ka Commission of Food Safety ba kan pynshai naei ba ki ioh ban test ia kita ki dohkha kiba lap formalin.
Kane ka seng ka la kdew ba ki dohkha kiba wan sha Jylla ki dei kiba wan na kylleng ki kompani na Andhra Pradesh bad ia kine ki dohkha la ioh syrnot ruh na ka Sorkar Andhra Pradesh ba pynshisha ba kim dei satia kiba la injek formalin.
Namar kane, kane ka Seng bad ki nongdie dohkha ki la rai ban leit iakynduh ia ka Commissioner of Food Safety mynta ka sngi ban ioh ia ka jingshai kaba bniah.
lah dei ban ia sngohkti bad ka association kein shwa ban shim sienjam kane rukom leh te ka dei beit ka jingleh donbor haba Kum ka association kim tip kim bna eiei
phi pyrkhat tang ia ka pla la jong…ma ngi ki Paidbah pat,,lada ngi bam da ka bih ruh long seh??? ngi kyrshan ia ka jingkhang dohkha ka sorkar…ka dei ruh ban phah test man ka por kumne