Shillong,11 Nailur:
Hadien ba la mih ki jingkynnoh ba u Officer Incharge ka Pynursla Police Station u la bom dusmon ia 5 ngut ki samla ryngkat ka jingshah kynnoh tuh blang, u SDPO Bah Ian Swer u la hiar dalade hi sha Pynursla PS ban ia kren bad ki Rangbah shnong ki Sordar shnong bad ki paidbah ka thain halor katei ka phang. U President ka KSU Pynursla unit u samla E.Diengdoh u la iathuh ba ha katei ka dorbar kaba la long ha thanad, ka sur kaba la mih na ki paidbah ka long ba dei ban pynkynriah kam beit ia u Ramprasad Bhusal na Pynursla PS ha kaba ki la kam ba ka jingdon utei u OC kam wanrah ka jingshngain ia ka shnong ka thaw. U samla Diengdoh u la ong ruh ba ha katei ka jingialang u Bah Swer, u la kular bad ba ula ong ba 100 na ka 100 ba un pynkynriah kam ia utei u OC.
Ka KSU ka la iathuh ruh ba ki Rangbah shnong bad Rangbah dong ki la byrngem da ka jingiakhih lada jia ba u Ramprasad, um shah pynkynriah kumba la pynpaw da u SDPO. Haba ia kren bad u Rupang u samla Diengdoh u la ong ba ka KSU ka dawa beit ba dei ban pynkynriah kam noh shisyndon ia u OC ka Pynursla PS “Ngim kwah ba utei u OC un dang don hapoh ka Pynursla PS” ong u President ka KSU. U la iathuh ruh ba ha dorbar la pynsngew ruh ia ka jingtuh blang bad ka jingshoh dusmon u OC ia ki khynnah samla ka shnong Pynursla da kaba mut ba ki ki dkhot ka KSU.
Kham hadien ia kane, la ioh jingtip ba ka hukum, na ka bynta ban pynkynriah kam ia utei u OC ka la poi bad u hap ban mih noh lashai ka sngi na Pynursla PS, hynrei ki la don pat ki rangbah hapoh ka Senior Citizen Forum kiba kyrshan ba dei ban pynneh shuwa ia u juh u OC ha katei ka PS, la iathuh ba ha katei ka Forum la ia donlang ruh ki Rangbah shnong , ki Sordar bad ki riew paidbah kiba la pynlong ka jingiakynduh ban ia kren ban dang pynneh ia u juh u OC.
Haba iakren bad uwei u rangbah uba la ia donlang hapoh katei ka Forum u la ong ba ka Forum ka la leit ban ia kynduh ia u SDPO bad SP ban ia kren ban pynneh shuwa ia u Ramprasad Bhusal ha Pynursla PS.
Haba pynpaw ia ka jingsngewsih, namar ka jingshah pynkynriah kam jong utei u OC, ki la kam ruh ba ki la iakren ia u halor ka mat ba u la shoh ia ki 5 ngut ki samla hynrei u la batai ia ki ba um shym la bom dusmon, hynrei u shu khyrwit shidieng ar dieng tang kum ka jingsneng, namar ka jingsaitlah jong ki ha kaba ula ong shuh shuh ba lada jia ba um leh kumne ki bahalor kin sa takrain ia u, namar ha katei ka shnong la don ka jingshah kawang maw ka ing briew ha kitei ki sngi ba jia ka jingshah shoh ki 5 ngut.
Lah ban pynkynmaw ba ha ka miet ba dang shu kut ka pakhang surok miet kaba la khot da ki sengbhalang ki samla na ka shnong Pynursla ki la kynnoh ba u OC ka Pynursla PS uba la bu-aid u la bom dusmon ia ki bad u la byrngem ruh ba lada ki dei ki dkhot ka KSU un set kai ar ne lai sngi ha phatok. Lah ruh ban pynkynmaw ba ha ka jingiakren bad ka KSU ha katei ka sngi ba shah shoh ki 5 ngut ka la kynnoh ba u Ramprasad Bhusal u dei uba don ka jingiajan bad ki nongkhaii mar Black sha khappud bad u ju iadonkti bad ki.
Phi don ban ong eiei?