Shillong, 10 Naitung: Kham mynshuwa ka shnong Laitlyngkot ka la buh ia ki jingthoh ha shi lynter ka rud surok kiba la maham ban leh pynjaboh ha katei ka shnong naduh ka jingbret niut pathar bad kiwei, hynrei u Rangbah Shnong katei ka shnong u bah Ryngkatlang Lyndem u la iathuh ba la mih pat ka hukum kaba la khang pyrshah ban pynieng ia kitei ki jingthoh (signboard) harud surok PWD bad la hukum ia ka shnong Laitlyngkot ba ka dei ban weng noh bad kumta la weng noh ia baroh ki jingthoh.
Namar katei ka jingshah weng ki jingthoh kiba thoh tyngkreiñ haruhd surok katei ka shnong kam don lad shuh da kumwei pat ban pynbna lane ban maham ia ki briew kiba nabar ba kim dei ban leh jakhlia lait noh sa tang ki jingpynbna ha ki kotkhubor. URangbah Shnong jong ka Iew Shillong ,Laitlyngkot u bah Ryngkatlang Lyndem u pynpaw ka jingsngewkhia halor ka jingbret niut pathar ki briew kiba wan kai nabar ha shi lynter ka surok Pynursla-Laitlyngkot.
“Watla ka Dorbar jong ka Iew Shillong, Laitlyngkot ka la maham tyngeh bym dei ban bret jaboh pathar ha shi lynter surok bad kaba la ju pahara ruh na ka por sha ka por ban ym don kiba kum kitei kijingleh jaboh,hynrei katei ka jingleh jaboh ka nang jur pynbanbad kane ka ktah ia ka jinglehkhuid ki briew katei ka shnong” u la ong. U bah Lyndem u la ong ba kiba bun ki briew ba bret jaboh ki dei ki briew na kane hi ka jylla kiba wankai pyngngad na ki don gbad ki shnong bapher bapher bad ka shnong kala maham tyngeh ia ki. Ula maham ruh ba lada jia ba ka shong ka ioh bat ia kum kitei ki briew kiba leh jakhlia yn phah lum ha ki ia ki jaboh ba ki bret bad u la kyntu ruh ba kin pyndonkam ia ki jaak bret niut ba ka shnong ka la buh.
Phi don ban ong eiei?