Shah weng kam ar ngut ki Muster Roll

Shillong, 18 Jymmang:
Ar ngut ki Muster Roll kiba trei hapoh PWD Sohiong Sub-Division ki la shah weng na ka kam jong ki bad ki la kynnoh ba katei ka jingshah weng jong ki ka dei halor ka jinghukum jong u myntri ba peit ia ka tnad Transport u bah HDR Lyngdoh uba dei ruh u MLA ka Sohiong. Kitei ki ar ngut kiba la shah weng kam ki dei kiba la tip kyrteng kum u Banshai Malngiang bad u Arson Malngiang. La hukum ia kitei ki ar ngut ba kim dei shuh ban dang trei da u ophisar jong katei ka tnad u R.S Syiem ha ka 1 tarik u iaiong.
Haba kren sha ki nongthohkhubor mynta ka sngi u Banshai bad u Arson ki la pynsngew ia ka rikod kaba kila ia kren lyngba ka mobile phone bad u bah R.S Syiem ha kaba utei u ophisar u la ong “Phi hap ban ia kren bad u ‘Maheh’ ia katei ka kam” katkum ka jingbatai kitei ki ar ngut ki la ong ba ia u bah HDR Lyngdoh la ju khot ieit ha katei ka thaiñ kum u ‘Maheh’. U Banshai u la kynnoh ba la pynshit ban weng kam noh ia ki da uwei u briew uba dei u nongkyrshan radba hjong u Maheh uba la tip kyrteng kum u Tibun Jana , “U Jana u la kynnoh ba namarba ngim thep vote ia u Maheh ha ki por elekshon, ngi dei ban shah weng kam noh” u la ong.
U bah Disparsing Rani u nongwad RTI haba kren sha ki nongthohkhubor u la ong ba ka jingshah weng kam kynsan kitei ki ar ngut ka dei ka jingpynkheiñ ia ka Minimum Wage Act jong ka sorkar pdeng bad kumjuh ruh ka jingpynbna jong ka sorkar lyngba u PWD Executive Engineer . U bah Rani u la ong ruh ba lyngba ka jingpynbna jong ka sorkar kaba ha ka 11 tarik u jylliew, 2014 ka la kren shai ba u Banshai u la rung ha ka kam ha ka 20 tarik u lber, 2009 bad ka tarik ba un shongthait ka long 21 tarik u kyllalyngkot,2047 katba u Arson pat u la rung kam ha ka 3 tarik u lber, 2010 bad ka tarik ba un shongthait ka dei ha ka 31 tarik u kyllalyngkot,2049 bad ia katei ka jingtip u la ong ba la ioh lum lyngba ka aiñ wad jingtip RTI Act 2005.
Haba pynrem ia u MLA ka Sohiong u bah Rani u la ong ba kane ka dei ka sien ba nyngkong kaba la jia ha ka khana pateng ka jylla Meghalaya ha kaba ha ka jaka ba ki nongmihkhmat kin iarap ban pynioh kam ioh jam ia ki samla ba kyrduh kam hynrei la knieh noh pynban ia ka kam da u nongmihkhmat paidbah. U bah Disparsing u la ong ruh ba un sa wad jingtip lyngba ka RTI ban kylli ha kano ka kyndon aiñ la weng kam ia kitei ki ar ngut bad hato la u MLA u lah ne-em ban knieh noh ia ka hok ki paidbah.