Shah ujor ka Nirmali Society of Jesus Christ Bym ioh bam thikna 18 ngut ki samla ha Bangalore

Shillong, 26 Jymmang:
Ka seng Meghalaya Social Programme Welfare Development Organisation (MSPWDO) mynta ka sngi ki la leit iakynduh ia ka bor pyniaid ka Nirmali Society of Jesus Christ (NSJC) kaba don ha Laitumkhrah hadien ba ki la ioh ia jingujor na ki kmie ki kpa jong ki katto katne ki khynnah ba kim don wat tang ka jaka thiah bad ka bam ka dih ruh kim ioh ban bam ha jaka shah hikai jongki la katto katne sngi ha Bangalore. Kine ki khynnah ki leit ban trei ha ki kompeni ba la pyniarap da kane ka society ha ka kam suhjain.
U President ka Meghalaya Social Programme Welfare Development Organisation (MSPWDO) u Bah Kitbok Thabah, u iathuh ba ka jingleit iakynduh ia ka NSJC ka long ban pan jingshai halor ki khynnah ba ki phah leit trei sha Bangalore hadien ba u la ioh jingujor na ki kmie ki kpa ba ki khun jongki, kiba la pyniarap da katei ka Society ban leit shah hikai ha ki kompeni suhjain, kim shym la ioh ioh bam ioh dih la katto katne sngi.
Hadien ba la iakynduh bad ki bor pyniaid ka Society u Bah Thabah u la ong ba don katto katne ngut ki khynnah ki bym shym la ioh tikna ia ka bam ka dih ka jaka sah, ka bym biang napdeng 18 ngut kynthup 12 kynthei bad 6 ngut ki shynrang jong kane ka kynhun ba mynta.
Naka liang u Bah Thabah u la kyntu ia katei ka Society ba kin shim khia ban iakren ba katei ka Kompeni ba kin pynbiang ia ki jingdonkam jong ki khamtam ia ka bam dih. “Ka seng kan sa buddien biang halor kane la kitei ki khynnah ki la ioh ne em ia ka bam bad ka jaka dem ba bit ba biang”, la ong u Bah Thabah. U la ong ba kine ki khynnah ki dei na thain nongkyndong ha kaba ki kmie ki kpa ki long kiba duk.
Hynrei ha ka jingiakren bad ki nongpynaid katei ka Society ki la iathuh ba ki pyniarap ia kine ki khynnah ban shah hikai lai bnai bad hadien ba la dep, ki lah ban trei syndon.
Ia mynta ki shu ai ei tang ka jaka sah, bad kiwei ki jingdonkam, la ong iwei na ki sister ba peit ia katei ka society kaba don ha Laitumkhrah.
“Baroh ngi la ju phah man ka por ngim ju ioh kano kano ka jingujor hynrei dei tang ha kane ka sien ba mynta, bad kiba ujor ruh ki don tang na iwei I khynnah”, la ong katei ka sister.