Shah ujor ejahar ki longkmie halor ka jingshah kynnoh ba ki mlien, ban klun ei ia jaka kiwei

Nongpoh: Arngut ki longkmie, kiba kynthup ia ka Kaikha Saprina na ka shnong Maikhuli, ha ryngkat ka Kong Christina Mukhim na Jorbil Killing, ki la shah kynnoh ba ki la leit ban klun jubor ia ka jaka jong saw ngut ki briew kaba don ha shnong Iongkhuli, bad kiba dei ka jaka jong ka ka Lina Momin na Pillangkata, ka R. Martha, ka K Tunyi bad ia ka jaka jong ka KV Rio, kiba dei ki briew na ka jylla Nagaland bad kiba thied jaka ha shnong Pillangkata, Ri Bhoi District.

Nalor katei ka jingshah kynnoh ha kitei ki saw ngut ki trai jaka, ba ki la leit ba klun jubor ia ka jaka jong ki kaba don ha Pillangkata, kitei ki arngut ki la shah kynnoh ruh, ba ki la donkti ha ka ban leit klun jubor ne ban leit kam biang ia ka jaka kaba don ha shnong Abri, Killing.

Halor katei ka jingwan klun jaka jubor da kitei ki ar-ngut ki Longkmie bad kiba la kynnoh ba ki la ban tei iing beain hapoh ka jaka jong ki, na ka liang kitei ki briew kiba la shah klun jaka, ki la pynrem jur halor katei ka jingwan leh donbor jong ki bad kiba la kyntu ia ki bor kiba peit ia ka jaka puta ba kim dei ban ailad ia kitei ki briew. Haba iadei bad katei ka jingwan klun jaka jubor, kitei ki saw ngut ki la byrngem ba kin ujor da la Ejahar ha Pillangkata Police Outpost.

Haba iadei bad katei ka jaka kaba don ha shnong Abri Killing, la ong ba ia katei ka jaka, ka Kaikha Saprina, ka la dep ban aiti sha ka shnong ha u snem 2019, ha kaba ka la ai sha katei ka shnong, khnang ba ki briew baduk bad ki bym iohlad ban thied jaka, ba kin ioh leit shna iing ha katei ka jaka, ba ka la ai sngewbha sha katei ka shnong, hynrei mynta pat la ong ba katei ka Kaikha Saprina, ka la die biang ia katei ka jaka sha kawei ka Longkmie kaba la tip kum ka Christina Mukhim bad kaba la pynlong ia ki briew ha katei ka shnong ba kin pyrshah eh.

Halor katei ka jaka ha Abri Killing, ki briew kiba la leit ban kyrshan ia ka sur u paidbah na katei ka shnong ha ryngkat u rangbah shnong, ki la kyntu ia ki bor bahalor bad khamtam ia u Syiem ka Raid Marwet ba ki dei ban leh eiei halor katei ka mat bad ba kim dei ban ailad ba katei ka briew kaba la ai sha ka shnong ba kan klun biang ia katei ka jaka, kata katkum ki sakhi satar ba katei ka jaka ka la dei pura jong la shnong Abri Killing.