Shah ujor CIC ki ophisar MCCL, bym jubab RTI

Shillong,
15 Rymphang:
U Chairman ka Sohra Challenge u bah Batista Khongphai u la mudui ia ki ophisar jong ka tnad Mawmluh Cherra Cement Limited ( MCCL) sha u Chief Information Commissioner ( CIC) namarba kim shym la jubab ia ka jingtip ba utei u samla u wad na katei ka karkhana dewbilat lyngba ka ain Right To Information (RTI). Utei u samla u la dawa na u CIC ba u dei ban pynshitom ia ki ophisar ka MCCL namarba ki niew bein pyllein pyllein ia ka ain wad jingtip da kaba leh bym suid niew ban ai jingtip kumba la pan lyngba katei ka ain.
Utei u samla u la ong ba u la ap jubab na ka MCCL la bun bun bnai halor ki katto katne ki jingtip kiba u kwah ban ioh ia ka MCCL, hynrei haduh kine ki sngi ym shym la jubab eiei ruh em. U la pyntip ba katto katne ki jingtip kiba u kwah ban tip kiba u la pan lyngba ka ain RTI ki long ban tip halor ki jingthied ia ki mashin kiba khlem pyndonkam, ki mashin ba la thied bad kiba la shu duh hi khlem pyndonkam, ki kam kontrak ba la weng noh bad kiba la sahteng khlem pyndep, ki rukom khot tender ban shalan tiar ban trei kontrak, ki kyrteng jong ki technical ophisar ba la thung bad peit ia ka jingpyntrei ia ka plant thymmai naduh ba sdang ka jingtrei bad ka por ban pyndep pura ia ki jingtrei ia ka plant.