Shah ujor 3ngut na Mawryngkang, ba pynbam eit

Shillong, 23 Naitung:
Ka bor synshar jong ka East Khasi Hills district ka la ujor pyrshah ia ka dorbar shnong ka Mawryngkang, halor ka nongrim ba la pynkhein ia ka hok briew man briew da kaba pynbam eit ia uba suba nongaiksuid.
U Deputy Commissioner u Sanjay Goyal u la ujor pyrshah ia u Rangbah Shnong u Bah Kerini Khongsit, u Assistant Rangbah Shnong Bah Thwer Tynsong bad u secretary Bah Jwatbor Khongwet.
U Additional District Magistrate (ADM) ba peit ia ka Law & Order u Bah Donny M Wahlang u la pynthikna ba u Deputy Commissioner u la ujor halor kane ka jingjia.
U la iathuh ba u la pan ia ka kaiphod na u ADM Bah W Biam halor kane ka kam.
Ki dkhot jong ka Mawryngkang kaba don hajan ka shnong Wahkdait harum Pynursla, ki la pynbor ia u Bah Noping Khongsit uba shah kynnoh men aiksuid ban bam da ka eit kum ka jingpynshitom ia u.
Kane ka jingkynnoh pyrshah ia u Bah Noping la pynlong hadien ba saw ngut ki kynthei jong ka shnong ki la kam ba ki pang na ka jingpang khyllah namar ka jingai ksuid u Bah Noping.
Halor ka jingkynnoh, jong kine ki saw ngut ki kynthei ba kem pang, ka shnong ha ka jingialang kaba long ha ka 20 tarik Naitung, ka la bthah ia u Bah Noping Khongsit ban bam ia ka eit u briew kum ka jingpynshitom.