Shah tyllep 2 tylli ki ing ha Malki, na ka jingtwa khyndew

Shillong,14 Nailar:
2 tylli ki ing ki la shah tyllep ha ka jingtwa khyndew mynta ka step ha Malki, katei ka jingjia ka la jia hapdeng ka por 8:00 -8:30 baje mynstep. Kia r tylli ki ing kiba la shah tyllep ki dei ka ing jong ka kong Monica Syiem lieh bad ka ing jong u bah Marcel Lyngdoh, kaba don ha Khliehshnong Wah kdait, Malki, Shillong.
Ha katei ka jingjia baroh ar tylli ki ing ki la shah ban ha ka khyndew kaba twa najrong namarba ki ing jong ki ki don sha kham sharum, ki jingjulor haduh mynta ym pat lah ban ioh jingkhein, katba u Rangbah Shnong katei ka shnong u la iathuh ba ki jingjulor ha katei ka ing ka dei namar ka jingrung ka ktieh bad ka jaboh hapoh kut ing, bad baroh ki marbam mardih ki la duh ei lut, ki Piep Um ki la shah tyllep ha ka khyndew bad ka painkhana ha ing u bah Marcel ka la twa.
Haba ia kren bad u Rupang u Rangbah Dong katei ka dong u bah Richard Kharkrang ,uba la ia don ryngkat bad u Secretary Dong u bah Elias Syiemlieh u la iathuh ba ka daw ka jingtwa khyndew ka dei namar ka jingjur palat u slap, bad kawei ruh ka dei na ka daw ka jingleh torti kiba sah kham hajrong ba ki buh kulmar ia ki dieng bah ba la dep ot lyngkhot ha ka jaka jong ki.
U Rangbah Shnong u la iathuh ba ka jingtwa ka la mih ruh namar ka nala um kaba pyntuid paidbah ka bym shym la shna bha, u la ong ba ha katei ka jingjia ka la jia kynsan kynsan ha ka por ba ki trai kim shym poi pyrkhat bad ka khyndew, ka ktieh ka jaboh ka la rung kynsan hapoh ing, u la iathuh ba ha katei ka jingjia ym shym la don kiba mynsaw jur hynrei ki don kiba mynsaw malu mala.
Ha ka jingiakren bad u Rangbah Shnong u la iathuh ba hadien katto katne por ba la jia katei ka jingjia ki para nongshong shnong ki la mih ban ia khyllie ia ka khyndew kaba la tap lup ia kitei ki ar ing bad ha ka por ba u nongthohkhubor u la leit sha katei ka jaka ki la dep ban weng noh ia ki jaboh bad ki ktieh ba la ban ia kitei ki ing.
Shuh shuh u la iathuh ba na ka liang ka MLA katei ka thain ka kong Ampareen Lyngdoh ka la wan ban jurip ia katei ka jingjia, bad ka la kular ha ki Rangbah Shnong ba kan pynbha noh ia kitei kin ala khnang ba kaba kum kane ka jingjia kan ym jia shuh hadien ha bud. U Rangbah shnong u la iathuh ba na ka liang u bah Pradin Kharmalai u Rangbah Shnong ka Malki Pyllun , u bah L.Kharmujai Secretary shnong Malki Pyllun bad ka Dorbar Shnong ki la wan ban jngoh ia katei ka jingjia.