Shah thombor ki kynhun Kristan ha Narayanpur

Mynta ka sngi ka 2 tarik u Kylla lyngkot 2023 ki la saphriang stet ki dur bad ki video kiba pyni ia ka jingshah thombor ka Kynhun Balang Khristan ha ka shnong Narayanpur.
Ka kyrwoh ba la phah lyngba ki WhatsApp la iathuh ba ha ka 2 tarik Kylla lyngkot 2023 kumba 1000 ngut ki riewshitniam bym dei Khristan ki la thombor ia ka Iingmane Catholic ha ka shnong Narayanpur.

Ha kine ki khyndiat bnai ba la lah ki Khristan ha kylleng ka Ri India ki shah ban beiñ bad ki riewngeit Khristan ki shah shoh shah dat khlem daw. Ha ka Jylla ba marjan, ka Assam ngi iohi ba la pynher syrngiew ia ki Balang Khristan da ki shithi na ki bor Sorkar kiba pan jingkheiñ ia ka jingdon briew bad kumta ter ter.

Ñiuma kane kam dei kaba thymmai, ki riewshitniam kiba dei ki dkhot jong ki seng shitniam Hindu ki la thombor ia ki ritpaid bad ki Khristan ha kylleng ki Jylla.

Naduh ka snem 1999 haba la thang im ia u Graham Staines bad ki khun jong u haduh ka jingiap u Father Stan uba la shah pharep bad iap kum u koidi khlem ka jingbishar hok ha ka snem 2021. Hapdeng kine ki snem ki la jia shibun bah ki jingthombor pyrshah ia ki Khristan bad kiwei ki ritpaid. Ha ka snem 2007 ha ki taiew lehkmen aiom Khristmas ki riewshitniam hindu ki la thombor ia ki Khristan ha ka shnong Khandamal. La thang bad pynjot ia ki Iingmane bad ki don ruh kiba la iap bad mynsaw.

Lada ma ngi ki Khristan ha ka Jylla Meghalaya ngi pyrkhat ba kine ki jingshah thombor ki Khristan ha kiwei ki Jylla kim ktah ei ei ia ngi namar ba kim jia ha ka Jylla jong ngi te ngi la bakla shibun.

Kumta lyngba kane ka kyrwoh nga khot lang ia baroh ki nongshong shnong ka Jylla ban pynrem jur halor ka jingthombor ia ki Khristan bad kiwei de ki ritpaid ha ki Jylla bapher ka Ri India.

Nga khot ba ngin ia ienglang kawei ban pyrshah bad pynrem jur ia ki kynhun shit niam kam pher lada ki iasnoh kti bad kano kano ka seng saiñ hima (Political party).
Ngin rai lang kawei ban kyntait ia ki seng saiñ hima kiba kyrshan bad iasylla bad ki kynhun shitniam kiba thrang ban pynkylla Ri Hindu ia ka Ri India ba laitluid.

Khublei
Kyrsoibor pyrtuh,
KAM.