Shah thok biang ha ka NBCC

Shillong, 13 Jylliew:
Ka dei ka sien kaba –ar ba ki paidbah kiba shong ba sah ha thaiñ khappud kin shah thok ha ka NBCC bad ha ka ophis u Deputy Commissioner ka East Khasi Hills. Ka sien kaba nyngkong ka dei ha ka 6 tarik u nailar, 2015 ha kaba la phah ap ia ki paidbah jong ka shnong Raid Lyting bad Nongsoh phan ba ki dei ban ia mih paidbah ban leit peit ia ka jaka kaba dei ban ker sainar shiah,la bthah ia ki ba kin ap ha ka por 11 baje hynrei ruh ki briew jong ka NBCC bad DC kim shym la wan mih satia ha katei ka jaka khlem da pyntip bad katei ka la pynbitar ia ki paidbah kiba la duh sngi duh ïa ei.
Sa mynta ka sngi pat kitei ki juh ki ophis ki la phah ap biang ia ki paidbah ha Pyrdiwah ha ka por 12 baje mynsngi, ki trai jaka ki trai bri ki la ia mih na la ing naduh dang 11 duna mynta ka step bad ki la ap ha Pyrdiwah haduh ka por 12:30 baje ruh ym don ba wan satia. Katkum ka jingtip ba la ioh na u bah Wantli Ryngksai u nongialam jong ki trai bri trai khyndew na ka shnong Darang la ong ba ka NBCC kan wan ban peit ia ka jaka ker sainar shiah naduh u Pillar 1270 haduh u Pillar 1272 8S,hynrei ka dei pynban ka jingshah thok. Ki trai jaka ki la pynpaw ka jingsngewsih namarba katei ka jingshah thok ha ka ophis u DC bad NBCC bad ki la pynpaw ruh ka jingsngewsih namar ba ba ki shu duh sngi duh ia ei.