Shah thngan ka longkmie 40 sngi kynthih, ba kan im biang rShah kem ar ngut ba pyut ka met iap ha Rynjah

Shillong, 27 Iaiong:
Ar ngut ki briew ki la shah kem halor ka jingiap jong kawei ka longkmie ha Rynjah kaba la sah pyut ha iing kaba la tip kyrteng kum ka B Suchiang ba 40 snem na shnong Shangpung ka East Jaintia Hills. Kine ki ar ngut ba shah kem ki kynthup ia u Waiamon Kharlukhi na Mawlai Umshorshor bad kawei ka kynthei kaba la tip kum ka Winnie Ryntathiang na Rynjah.
Haba iakren bad u SP ka East Khasi Hills u Bah M Kharkrang u la ong ba ka met ba la pyut jong katei ka longkmie, la ioh tam na kawei ka iing na iing ka Kong Ryntathiang ha Rynjah.
Katkum ka jingong u Bah Kharkrang, katei ka longkmie ka la khlad naduh ka taiew ba khad duh jong u Rymphang kum ka jingshah thngan namar ka jingleh niam jongki.
”Ka Kong Suchiang ka la khlad katba ka dang shah thngan. Hynrei  kine kiba shah kem ar ngut kim shym la iathuh ia ka jingiap jongka, namar ba ki ngeit ba ka dei ka jingngeit jongka ba kan im biang hadien 40 sngi katkum ka jingngeit niam jongki”, la ong u SP ka East Khasi Hills. Ha kajuh ka por, u Bah Kharkrang u la ong ba ia kane ka kam la ioh jingtip ki pulit ba la pyntip da ki briew kiba sah ha katei ka dong namar ka jingsma kaba la shyrkhei kaba mih na katei ka iing.
U SP u la ong ba ki dang ap ia ka kaiphod ka post mortem  bad ki la kurup ruh katto katne ki jingthoh kiba don ha katei ka iing.
U Bah Kharlukhi uba dei u para ba sah lang ha katei ka kamra bad ka Kong Suchiang u la phet noh sha Mawlai hadien ba ka Kong Suchinag ka la khlad bad u shu wan man ka sngi ban plie ia katei ka kamra ban leh ia ka jingduwai hapoh ka iing bad leit phai biang, la ong uwei u rangbah katei ka shnong.
Katkum ka jingiathuh jong ki rangbah katei ka shnong, katei ka longkmie ka la khlad la ar taiew, hynrei u Bah Kharlukhi u la ong ba katei ka longkmie ka pynlong ia ka jingshah thngan na ka bynta 40 sngi namar ba ka dang pynlong ia ka jingduwai.