Shah thngan ka HANM ban dawa pynbeit pud

Shillong:  Ka seng Hynniewtrep Achik Youth Movement (HANM) ka la pynlong ia ka jingiashong kyrain kaba shi sngi mynta ka sngi ha phyllaw ka Additional Secretariat Shillong ban dawa na ka sorkar ba kan pynbeit noh mardor ia ka kam happud bad ka Assam.

Ha kane ka jingiashong kyrain, la wan iashim bynta ki dkhot ka seng ryngkat ki lama, ki plakad bad ki jingthoh kiba dawa ban pynbeit noh ia u pud u sam hapdeng ka Meghalaya bad ka Assam.

Haba kren sha ki nongthoh khubor u president ka HANM, u bah Lamphrang Kharbani u la ong ba ka seng ka khmih lynti ba ka sorkar kan khot iakren ia ka seng hadien ka elekshon MDC namar ba u symbud myntri rangbah u bah Prestone Tynsong u la kular ba un leh ia kane.

U la ong ba ka seng NPP ha ka elekshon MLA ba la dep ka la kular ba kan pynbeit noh ia u pud u sam lada kan wan ha ka bor bad kane ka dei ka lynti kaba biang namar ba kane ka seng ka ialam ban synshar ia ka sorkar ha kane ka jylla.

“Ngi kyrmen ba ka NPP kan pyndep ia ka kular jongka namar ba mynta ka ialam ia ka sorkar ha ka jylla” la ong u president ka HANM.

U la ong ba ka seng ka la don ha ka jingpynkhreh ha ka jingmut jong ka, ba kan pynlong ia ka jingiakhih lada ka sorkar ka sngap man man hynrei ia mynta kam pat kwah ban pynbna paidbah.

“Ngi la shah skud jaka ha ka Assam ha Langpih bad ha kiwei ki jaka ba mar khap bad ka Assam kum ha Block I bad Block II. Ka sorkar Assam ka la pyni ia ka jingleh donbor jong ka namar ba ka sorkar Meghalaya ka la shu long jem” la ong u president ka HANM.

U la ong ba ka seng ka sngew ba ka sorkar ka dei ban ailad noh ha ki paidbah ba sah ha ki khappud ba kin jied shano ban leit, sha Meghalaya ne sha Assam khnang ban pynbeit noh ia u pud u sam.

Kham mynshwa, u bah Lamphrang u la ong ba ka seng ka ai ruh ia ka jingkyrshan ia ka PIL ba la ujor da u bah THS Boney halor ka jingsahteng ka kam iakajia pud bad ka Assam haduh kine ki sngi.