Shah thang u skum kba, ki khar Nepali ha Nongpoh

Nongpoh, 28 Jymmang:
Hadien ka jingkulmar kaba la mih hynnin ka sngi ha Nongpoh, namar ka jingiapynibor hapdeng ki dkhot ka KSU bad ki bor Pulit ha Nongpoh PS, kaba la wanrah shisha ia ka jingtieng jingsyier jong ki paidbah nongshong shnong ha Sor Nongpoh hi baroh kawei, hynrei mynta ka janmiet ha ka por 7 baje ei ei, ki paidbah ha ka thain Nongpoh sa shisien ka jingtieng ka la wan biang ha ki, hadien ba ki runar ki bym shem la lah ban ithuh ki la leit ban thang dusmon ia u skum kba jong ki khar Nepali kaba don ha Nongpoh.
Utei u skum kba uba la shah thang dusmon noh ha ki Runar mynta ka janmiet, la long trai da u Hulas Rai bad ka Susikala Rai, ha kaba kane ka trai ka la pynpaw ia ka jingsngewsih hadien ba utei u skum uba la buh snem snem na ka bynta ban bsa ia ki masi khem dud.
Donbok ha kane ka jingjia kam shem la wanrah ia kano kano ka jingjia ba sngewsih bad jingmynsaw jong ki briew, hynrei ka la shu don ka jingduhnong ia ki trai jong utei u skum kba.
Namar ka jingpoi kloi da ki Kali pynlip ding na Nongpoh, ia ka jingklang jong kane ka ding la lah ban teh lakam, hynrei ka la shim por da ki kynta ia ki pulit pynlip ding ba kin lah ban tem ia kane ka jingpluh ding.